Biznes

Kukësi dhe Gjirokastra me normën më të ulët të papunësisë, Durrësi dhe Lezha me më të lartën


Tregu i punës po ndikohet gjithnjë e më shumë nga rrudhja e popullsisë si pasojë e emigracionit të lartë dhe rënies së lindshmërisë me ritme të shpejta.

Sektorë të tërë të ekonomisë po japin alarmin për punonjës.

Në Kukës dhe Gjirokastër, në dy qarqet më periferike të vendit, papunësia po shkon drejt shuarjes, për shkak se popullsia e këtyre rajoneve përbëhet kryesisht nga njerëz në moshë pensioni.

Referuar një raporti të INSTAT-it, në tremujorin e parë të vitit 2022, Durrësi dhe Lezha kanë qenë dy qarqet me normat më të larta të papunësisë, përkatësisht 16.1 për qind dhe 22.7 për qind.

E gjitha në një kohë që norma mesatare e papunësisë në shkallë kombëtare në këtë tremujor ka qenë 11.3 për qind.

Sa i përket Gjirokastrës dhe Kukësit kanë pasur normën më të ulët të papunësisë me rreth katër për qind.

Qarku i Kukësit, në bazë të të dhënave zyrtare, është qarku më i varfër në vend dhe mbi 70 për qind e ekonomisë dominohet nga bujqësia.

Të dyja këto qarqe janë shpopulluar me shpejtësi nga emigracioni i lartë dhe lëvizjet e brendshme.

Analizat e Bankës Botërore për ecurinë e punësimit në Ballkanin Perëndimor kanë gjetur se, ulja e papunësisë në Shqipëri në një masë të madhe i dedikohet emigracionit të lartë.

Në tremujorin e parë, norma e papunësisë ka pësuar rritjen më të lartë vjetore në Qarkun e Dibrës.

Në këtë qark, shkalla e papunësisë ka shënuar 14.8 për qind, nga 23.6 për qind që ishte në tremujorin e parë të vitit 2021.

Sakaq, rënia më e madhe e papunësisë është vënë re në Qarkun e Vlorës, me mbi tetë për qind në raport me vitin e kaluar.

Në 12 qarqe, të dhënat mbi papunësinë tregojnë se pesë prej tyre (Lezhë, Durrës, Vlorë, Dibër, Tiranë) e kanë treguesin mbi mesataren kombëtare, ndërsa në shtatë qarqe të tjera treguesi i papunësisë është nën mesataren kombëtare.

Në vitet e fundit, popullsia në moshë pune është në rënie të shpejtë dhe kjo do të çojë në furnizime më të ulëta të forcës së punës.

Vitin e kaluar, popullsia në moshë pune ka shënuar rënie me 32 mijë persona ose 1.6 për qind, rënia më e fortë në të gjithë periudhën e tranzicionit.

Në një studim të fundit mbi potencialet e zhvillimit të sektorit privat në Shqipëri, Banka Botërore evidentoi se forca e punës dhe mungesa e aftësive janë shndërruar në një pengesë serioze për zgjerimin e biznesit.

Sipërmarrjet shqiptare identifikojnë mungesën e punëtorëve të kualifikuar si pengesën e tretë më të madhe me të cilat përballen.

Po ashtu, kërkesa për punëtorë me arsim të lartë është rritur gjatë dekadës së fundit dhe është në rritje, por shumë biznese kanë pohuar se kanë qenë në vështirësi në gjetjen e punëtorëve me aftësi specifike teknike.

Mirëpo, mungesa e punëtorëve është një pengesë veçanërisht serioze për kompanitë e huaja që duan të investojnë në Shqipëri.

Firmat me pronësi të huaj, që operojnë në Shqipëri, kanë nxjerrë gjetjen e punëtorëve të kualifikuar si sfidën e tyre të dytë më të rëndësishme.

Emigrimi ka të ngjarë të reduktojë më tej numrin dhe cilësinë e aftësive të fuqisë punëtore, duke dobësuar atraktivitetin e Shqipërisë, si destinacion në sektorët me intensitet të krahut të lirë të punës.

Kështu, Banka Botërore sugjeron që vendi të largohet nga politikat e investimeve të huaja të fokusuar në fuqinë punëtore me kosto të ulët.

Gjithashtu që të miratojë një strategji të re të bazuar në shfrytëzimin e investimeve publike në arsimin teknik, tërheqjen e IHD-ve që kërkojnë efikasitet dhe kanë produktivitet më të lartë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore