Kryetarja e Kushtetueses: S’e pengojmë reformën në drejtësi, pala humbëse gjithmonë ka kritika

Kryetarja e Gjykatës Kushtetuese, Gresa Caka-Nimani, iu është kundërpërgjigjur akuzave të ministres së Drejtësisë, Albulena Haxhiu, e cila pati thënë se “kushtetuesja është shndërruar në një pengesë për reformat në drejtësi”, ndonëse Qeveria ku ajo është ministre për tre vjet qeverisje, ka shkelur pesë herë Kushtetutën.

Caka-Nimani, e ka mohuar një gjë të tillë, duke thënë Gjykata Kushtetuese jo vetëm që nuk pengon në reformën në drejtësi, por kontribuon në përforcimin e shtetit të së drejtës dhe përfarimin e Kosovës me standardet të cilat i përcakton Këshilli i Evropës dhe Bashkimi Evropian, anëtarësimin në të cilat Kosova e synon.

“Të gjitha partitë politike, kanë humbur apo fituar raste të rëndësishme në Gjykatë. Sigurisht, pala humbëse gjithmonë ka kritikuar gjykatën. Është në natyrën vendimmarrëse të Gjykatës Kushtetuese dhe jo vetëm edhe në gjykatat e rregullta që gjithmonë ka një palë humbëse”, tha ajo në një intervistë për emisionin “Tempus” në KTV.

E para e Gjykatës Kushtetuese ka theksuar se respektimi i Kushtetutës është detyrë e secilit autoritet publik në Kosovë, meqë sipas saj, konstatimi që bën gjykata në kontekst të një ligji dhe vlerësimi që një ligj i kontestuar para saj, nuk është në përputhje me kushtetutën nuk mund të shërbejë si argument që gjykata është kundër reformave në drejtësi.

“Por, duhet të shërbejë si detyrim për reflektim, të dy pushteteve tjera që të sigurohen që ligjet e propozuara ose miratuara janë në përputhje me Kushtetutën”, ka shtuar e Caka-Nimani.

Tutje, ajo ka potencuar se liria e shprehjes dhe e mendimit është vlerë themelore e Kosovës dhe se kjo liri ngërthen edhe kritikën dhe se çdo vendim i Kushtetueses duhet t’i nënshtrohet analizës, debatit dhe kritikës.

“Kritikat ndaj pushtetit gjyqësor apo gjykatave kushtetuese janë të zakonshme edhe në demokracitë tjera, kryesisht në demokraci më të reja. Ashtu siç kam adresuar përgjatë shënjimit gjyqësor të Gjykatës Kushtetuese, ndërveprimi mes pushteteve medoemos reflekton tension dhe ky tension reflekton faktin që demokracia në Republikën e Kosovës po funksionon”, sqaroi ajo.

Shkelësit serikë të Kushtetutës

Në tri vjet e qeverisje në mandatin katër vjeçar, qeveria e udhëhequr nga Albin Kurti e ka shkelur – plotë – pesë herë Kushtetutën e Kosovës.

Shkeljen e parë do ta bënte Ministrja e Arsimit, Arbërie Nagavci.     

Ajo kishte ndërhyrë në kompetencat e Komunës së Kamenicës – që atë kohë udhëhiqje nga Qëndron Kastrati – për reformën në Arsim, prandaj edhe Gjykata Kushtetuese në një vendim të shpallur me 30 dhjetor të vitit të kaluar kishte thënë se ka tejkaluar kompetencat e veta.

Nagavcin do ta pasonte Ministrja e Drejtësisë, Albulena Haxhiu.

Ligji për Këshillin Prokurorial të Kosovës, i hartuar nga Haxhiu dhe kabineti i saj, ishte dërguar për tu vlerësuar kushtetutshmëria e tij nga deputetët e opozitës.

Vendimi i Kushtetueses, i publikuar me 24 mars, tregonte se ligji binte ndesh me nenet e Kushtetutës për Formën e Qeverisjes dhe Ndarjen e Pushtetit, Kompetencat e Kuvendit, Rolin e Avokatit të Popullit, Barazinë para Ligjit, e nenin për Këshillin Prokurorial.

Shkelja e tretë do të konstatohej me 4 korrik, kur Gjykata Kushtetuese, do të vendoste në favor të Komunës së Prishtinës, lidhur me dy vendime të ndara të Kuvendit Komunal të Komunës së Prishtinës, ku ishte miratuar propozimi i kryetarit të komunës, Përparim Rama, për këmbimin e pronës së paluajtshme komunale me pronë të paluajtshme në pronësi të personave privat, me qëllim të realizimit të planit rregullues “Prishtina e re – Lindje”, me destinim për ndërtim të shkollës, kopshtit dhe hapësirave gjelbëruese.

Po ashtu Gjykata Kushtetuese kishte vendosur unanimisht që të deklaronte kërkesën nga deputetët e opozitës për Bordin e RTK-së të pranueshme dhe të refuzonte kërkesën për masë të përkohshme lidhur me efektet e vendimit të kontestuar.

Më 3 gusht, Kushtetuesja njoftoi se disa nene të Ligjit për Zyrtarët Publikë ishin anti-kushtetues, kjo pasi që dy partitë opozitare; PDK-ja e LDK-ja e kishin dërguar në Kushtetuese.

Ndryshe, në Gjykatën Kushtetuese janë dërguar edhe ligje të tjera të hartuara nga Qeveria e Kosovës – Ligji për Byronë, Ligji për Pagën Minimale dhe Ligji për caktimin e çmimeve tavan për produktet bazë – që mund të shpallen anti-kushtetuese dhe lista e shkeljeve kushtetuese mund të ndryshojë.

Haxhiu: Gjykata Kushtetuese, pengesë për reformat në drejtësi

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.