Kryetari i Zubin Potokut: S’e kam ndërmend të jap dorëheqje

“Për dorëheqje nuk po mendojmë njëherë, s’e kam njet me jep”, ka deklaruar Kryetari i Komunës së Zubin Potokut, Izmir Zeqiri, në një prononcim për Albanian Post pasi u pyet nëse po e mendon dorëheqjen si opsion, tani kur përveç situatës së tensionuar në Veri nga serbët lokalë, kjo është kërkesë edhe e ndërkombëtarëve.

“Jemi në konsolidim e sipër, është dinamikë e punës, as nuk po e mendojmë dorëheqjen njëherë. Kjo çka po ndodhë tani, po dëgjojmë nga pak në lajme, por nuk po e mendojmë në atë drejtim fare”.

Madje, Zeqiri tha se nuk e ka ndërmend të jap dorëheqje as nëse ja kërkon kryeministri e as presidentja.

“As kryeministri as presidentja, për pa u konsultu mbi bazën ligjore dhe arsyeshmërinë, ju lutem”.

Presidentja duhet të ketë parasysh edhe ligjshmërinë tonë, unë s’di qysh ka me shpallë zgjedhje kur ne jemi në funksion për momentin”, u shpreh Zeqiri.

“Duhet analizë më e zgjedhuar, çfarë prodhimi do të japin këto zgjedhje të reja? Mirë i shpallin zgjedhjet, por çfarë do të prodhojnë? A do të prodhojnë situata edhe më këqija apo më të mira? Ky është problemi, duhet një analizë këtu”, deklaroi Zeqiri për Albanian Post.

Kërkesat e ndërkombëtarëve, Zeqiri thotë se “po flasin për dorëheqje, po dëgjojmë nga pak por ne jemi duke u konsultuar me kabinetin, nuk mendojmë për dorëheqje për momentin”.

“Edhe nëse vjen radha te ndonjë palë zgjedhje të reja, ata duhet me pa arsyeshmërinë, nuk mund të thonë veç hajt jep dorëheqje pa ndonjë arsye. Duhet arsyeshmëria, duhet objektiviteti, ata që po mendojnë për zgjedhje. Ne jemi duke punuar”, përfundoi Zeqiri.

Të parët që kërkuan proces të ri zgjedhor në katër komunat veriore të Kosovës, të banuara kryesisht me serbë, për të de-eskaluar situatën e tensionuar që u krijua më 26 maj, pasi që kryetarët e rinj, shqiptarë të dalë nga zgjedhjet e 23 prillit u vendosën në objektet komunale me asistim të Policisë së Kosovës, ishin presidenti francez Emmanuel Macron dhe kancelari gjerman Olaf Schol.

Në takim me presidenten e Kosovës, Vjosa Osmani, këta të dy kërkuan proces të ri zgjedhorë në komunat veriore për të shtensionuar raportet dhe stabilizuar situatën e krijuar e cila u përkeqësua më 29 maj kur protestuesit serbë lënduan 30 ushtarë të KFOR-it.

“Franca dhe Gjermania u kërkuan udhëheqësve të Kosovës dhe Serbisë të organizojnë zgjedhje të reja në rajonet e prekura nga trazirat sa më shpejt që të jetë e mundur”, tha Macron të enjten e 1 qershorit.

Shtensionim, zgjedhje të shpejta në veri dhe rikthim në dialogun për normalizim, ishte edhe kërkesa e të dërguarit të posaçëm të BE-së për dialogun Kosovë – Serbi, Miroslav Lajçak, pas takimit të mbrëmshëm me kryeministrin e Kosovës, Albin Kurti.

Ndërsa i dërguari i ShBA-ve për Ballkanin Perëndimor, Gabriel Escobar, pas takimit me kryeministrin e Kosovës, Albin Kurti, të hënën në darkë, tha se e respektojnë autoritetin e Qeverisë së Kosovës për çështjen e zgjedhjeve në veri, “respektojmë strukturën kushtetuese të Kosovës dhe nuk ka votim të detyrueshëm në këtë shtet. Por, një gjë është e qartë, pra që duhet të respektohet sundimi i ligjit dhe harmonia mes grupeve etnike, prandaj ne po mendojmë që të gjejmë një rrugë përpara”, u shpreh më pas ai.

Çfarë ndodhi?

Më 23 prill, u mbajtën zgjedhjet e jashtëzakonshme në katër komunat veriore të Kosovës të banuara kryesisht me serbë.

Në Leposaviq, Zubin Potok, Zveçan e Mitrovicë e Veriut, procesit zgjedhorë iu nënshtruan vetëm shqiptarët. As në garë për kryetarë e as në votim, serbët që janë shumicë në këto komuna nuk morën pjesë. Kjo pasi që iu kërkua nga partia më e madhe serbë në Kosovë, Lista Serbe, me direktiva të presidentit serb, Aleksandër Vuçiç.

Rezultatet e këtyre zgjedhjeve prodhuan katër shqiptarë, të cilët morën votat e 3% të banorëve të këtyre komunave.

Ligjërisht zgjedhjet u certifikuan nga Komisioni Qendror Zgjedhor dhe kryetarët filluan punën në objekte komunale, pasi dhanë betimin, gati një muaj pas certifikimit të zgjedhjeve.

Më 26 maj u desh të asistonte Policia e Kosovës, që ata të shkonin në zyrën e kryetarit të komunë për të kryer detyrat e përshkruar sipas ligjeve në fuqi.

Serbët lokal dolën në protesta. Kërkuan largimin e kryetarëve të rinj shqiptarë dhe largimin e Policisë së Kosovës. Të hënën e 29 majit protesta eskaloi, ata lënduan 30 ushtarë të KFOR-it të cilët po ofronin siguri para objektit të komunës në Zveçan. Protesta kishte edhe në Leposaviq e Zubin Potok, diçka më e qetë se ajo e Zubin Potokut.

Shumë vetura u dogjën e shkatërruan, disa zyrtarë policorë u lënduan e shumë gazetarë u sulmuan, kërcënuan e penguan në kryerjen e detyrave të tyre.

Si mund të mbahen zgjedhjet e reja në veri të Kosovës, tani?

Që në Mitrovicë të Veriut, Leposaviq, Zubin Potok e Zveçan të ketë zgjedhje të reja tani, kryetarët e zgjedhur më 23 prill duhet të dorëhiqen.

Ish-kryetari i Gjykatës Kushtetuese, Enver Hasani, në një prononcim për Albanian Post ka sqaruar se nëse kryetarët nuk dorëhiqen, atëherë ata mund të suspendohen.

“Ekziston mundësia e shkarkimit të tyre nga ana e qeverisë, ku ata fillimisht duhet të suspendohen me një akt qeveritar dhe, më pas, ai akt për suspendim duhet të konfirmohet nga ana e Gjykatës Kushtetuese”, deklaron Hasani.

“Nëse Gjykata Kushtetuese e konfirmon vendimin për suspendim, atëherë qeveria mund të shkarkojë kryetarin përkatës të komunës që paraprakisht ka pasur akt mbi suspendimin”.

“Mirëpo, nuk shoh arsye pse ata nuk do të japin vetë dorëheqjen: ata e kanë ditur që kjo është një zgjedhje e përkohshme dhe kanë pranuar të luajnë këtë rol që ka shijen e lojës fëmijërore”, shtoi ai.

Ata e kanë ditur që kjo është një zgjedhje e përkohshme, tha ndër të tjera Hasani ”dhe kanë pranuar të luajnë këtë rol që ka shijen e lojës fëmijërore”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.