Kryetari i AKB: Hapja e aeroportit në Kukës, mundësi e mirë për zhvillimin ekonomik të Kosovës

Aleanca Kosovare e Bizneseve, hapjen e aeroportit në Kukës e ka vlerësuar si mundësi të mirë për zhvillimin ekonomik të Kosovës.

“AKB e vlerëson si mundësi të madhe dhe te re për Kosovën, për ekonominë, turizmin dhe investimet e huaja me rastin e hapjes së  aeroportit të ri në Kukës”, ka shkruar në Facebook, kryetari i AKB-së, Agim Shahini.

Ai tha se me hapjen e aeroportit të ri, pasagjerët do të përfitojnë shërbime më të lira dhe të shpejta, si dhe do të ketë më shumë zgjidhje për ardhjen e diasporës.

“Kjo është më shumë në funksion të Kosovës se sa të Shqipërisë, pasi që Prishtina ka rreth 100 km, kjo është një konkurrencë e drejtpërdrejt e aeroportit të Prishtinës, që pasagjerët do të përfitojnë shërbime më të lira e më të shpejta, por edhe më shumë zgjidhje për udhëtimin e diasporës shqiptare”, ka thënë Shahini.

Sipas tij kjo rritë edhe mundësinë e konkurrencës së importeve dhe eksporteve të mallrave, shërbimeve kombëtare e ndërkombëtare të Kosovës dhe të Shqipërisë.

Ndërkohë, më 18 prill, Shqipëria ka përuruar hapjen e Aeroportit Ndërkombëtar të Kukësit i cili mban emrin “Zayed-Flatrat e Veriut”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.