![](https://albanianpost.com/wp-content/uploads/2024/05/Untitled-136.png)
Kryeministri i Sllovakisë, Robert Fico, është jashtë rrezikut, por mbetet në terapi intensive katër ditë pasi u qëllua nga një person i armatosur.
“Ai ka dalë nga gjendja e rrezikut, por situata e tij mbetet serioze dhe ai kërkon kujdes intensiv”, u tha gazetarëve Robert Kaliňák, aleati më i ngushtë politik i Ficos.
“Ne mund ta konsiderojmë gjendjen e tij të qëndrueshme me një prognozë pozitive”, tha Kaliňák jashtë spitalit në qytetin qendror të Banská Bystrica, ku po trajtohet Fico.
Kaliňák theksoi se Fico do të qëndronte në spitalin e Banska Bystrica për momentin, duke shtuar se gjendja e tij ishte ende shumë e rëndë për ta lejuar atë të transferohej në një spital në kryeqytet, Bratislavë.
Fico, 59 vjeç, u qëllua të mërkurën ndërsa po shkonte për të përshëndetur mbështetësit pas një takimi të qeverisë në qytetin qendror të minierave Handlová.
Kaliňák tha më herët se Fico kishte pësuar katër plagë me armë zjarri, dy të lehta, një mesatare dhe një të rëndë.
Ministri i Brendshëm i Sllovakisë, Matush Šutaj-Eštok, tha se nëse një nga të shtënat “shkonte vetëm disa centimetra më lart, do të kishte goditur mëlçinë e kryeministrit”.
Fico iu nënshtrua një operacioni pesë-orësh të mërkurën dhe një operacioni të dytë të premten.
I armatosuri i dyshuar, i identifikuar nga mediat sllovake si ish-roje sigurie dhe poet, Juraj Cintula, 71-vjeçar, është akuzuar për tentativë vrasje me paramendim dhe është vënë në paraburgim nga një gjykatë penale speciale të shtunën.
Gjykata e specializuar penale e Sllovakisë urdhëroi ndalimin e të dyshuarit pasi prokurorët thanë se kishin frikë se ai mund të ikte ose të kryente krime të tjera, tha një zëdhënës i gjykatës.
I dyshuari mund të ankohet kundër urdhrit në gjykatën supreme.
Klima në vend
Ndërkohë, udhëheqësi i opozitës sllovake, progresisti Michal Simecka, paraqiti sot një kallëzim penal për kërcënime me vdekje dhe dëshmoi në Agjencinë Kombëtare të Krimit (Naka), raportoi DennikN.sk.
“Kërcënimet arritën tek unë, tek vajza ime dhe tek partnerja ime. Kanë qenë disa, kanë qenë specifike dhe drastike nga njerëz konkretë. Fatkeqësisht, kjo nuk është asgjë e re”, tha Smecka për kërcënimet.
Ajo që ndodhi është “pasojë e natyrshme e kësaj klime, nuk mund të përfundonte ndryshe”, vuri në dukje me hidhërim këshilltari i kryeministrit, Eduard Chmelár.
“Tani nuk duhet të fajësojmë njëri-tjetrin, por të kërkojmë nga e gjithë shoqëria që të qetësohet”, ka shpresuar ai.
Dhe për të dhënë një shembull të mirë, ai vlerësoi se opozita anuloi protestat e ditës kundër planit të diskutueshëm të qeverisë për të riparuar median publike që do t’i jepte qeverisë kontrollin e plotë të radios dhe televizionit shtetëror.
Që ajri është helmuar prej disa kohësh, dëshmon fakti se në mesin e politikanëve të kërcënuar përfundoi edhe presidentja në largim Zuzana Caputova: pikërisht për shkak se ishte e rraskapitur nga kjo klimë politike, u hodh në peshqir dhe nuk qëndroi për ri- zgjedhjet prillin e kaluar.
“Një sulm brutal dhe i pamatur, jam në shok – reagoi ajo. I uroj Robert Ficos shumë forcë në këtë moment kritik dhe shërim të shpejtë”.
Reagime tronditëse nga e gjithë bota, nga Biden (“Jill dhe unë po lutemi për një shërim të shpejtë, ne e dënojmë këtë akt të tmerrshëm dhune”) te Putini (“Ky krim i urryer nuk mund të ketë asnjë justifikim”).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com