Kryeministri i Belgjikës letër Albin Kurtit, i bën thirrje për përfundimin e dialogut Kosovë-Serbi me një marrëveshje historike

Kryeministri i Kosovës, Albin Kurti, me rastin e marrjes së detyrës ka pranuar një letër urimi nga Kryeministri i Belgjikës, Alexander De Croo, i cili i ka bërë thirrje për përfundimin e një marrëveshjeje për normalizim të marrëdhënieve midis Kosovës dhe Serbisë.

“Qeveria belge mbetet plotësisht e bindur në ftesën për integrim evropian të Kosovës dhe të shteteve të tjera të rajonit të Ballkanit Perëndimor. Në këtë këndvështrim, Belgjika mbështet plotësisht procesin e dialogut ndërmjet Kosovës dhe Serbisë, dhe bën thirrje për përfundimin e një marrëveshje historike për normalizimin e marrëdhënieve midis dy shteteve fqinje”, shkruhet në letër.

Po ashtu, De Croo ka ritheksuar cilësinë e marrëdhënieve miqësore dhe bashkëpunimin mes dy vendeve, si edhe gatishmërinë për të punuar bashkë në forcimin dhe thellimin e këtyre marrëdhënieve.

Në këtë letër, kryeministri belg i ka uruar Kurtit sukses në zbatimin e programit ambicioz të reformave.

“Me shumë interesim kam marrë njoftimin mbi synimet e Kurtit, lidhur me forcimin e shtetit të së drejtës dhe reformën në drejtësi, konsolidimin e institucioneve, zhvillimin shoqëror e ekonomik dhe të gjitha këto janë në të mirë të jetës së qytetarëve dhe afrimit të Kosovës me Bashkimin Evropian”, thuhet në njoftimin për media nga zyra e kryeministrit.

De Croo është shprehur se do të ishte i lumtur me mundësinë e takimit me kryeministrin Kurti, në vizitën e tij të ardhshme në Bruksel.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.