Kryemadhi mesazh Metës para mbledhjes: Çdo përjashtim është mbyllje e partisë, hiq dorë nga përjashtimet

Partia e Lirisë do të mbledhë Komitetin Drejtues Kombëtar pasditen e sotme, ku pritet që të mbajë fjalën e tij Kryetari i Partisë së Lirisë Ilir Meta.

E pranishme do të jetë edhe Monika Kryemadhi e cila e ka paraprirë këtë mbledhje me një mesazh një rrjete sociale drejtuar Metës lidhur me përplasjet brenda partisë.

Ajo shkruan se “meritokracia, mendimi ndryshe, vlerat e individëve në vite që kanë dhënë ndihmesën, në një parti politike janë jetësore dhe hapja ndaj të resë i bëjnë ato edhe më të domosdoshme për rigjallërimin politik”.

Sipas Kryemadhit “çdo tentativë imponuese përjashtuese apo edhe bullizuese ndaj kujdo që mendon jashtë rreshtit është devijim ndaj mbylljes jo ringritjes”. Nisur nga reagimi i Kryemadhit në këtë mbledhje pritet që të ketë përjashtime të tjera, në kuadër të “Rithemelimit” të partisë që ka nisur vetë Meta.

“Meritokracia, mendimi ndryshe, vlerat e individëve në vite që kanë dhënë ndihmesën, në një parti politike janë jetësore dhe hapja ndaj të resë i bëjnë ato edhe më të domosdoshme për rigjallërimin politik. Sot më shumë se kurrë opozita dhe aq më shumë Partia e Lirisë kanë nevojë për to. Çdo tentativë imponuese përjashtuese apo edhe bullizuese ndaj kujdo që mendon jashtë rreshtit është devijim ndaj mbylljes jo ringritjes. Të rinjtë duhet të mësojnë nga gabimet e të vjetërve jo ti përsërisin ato. Ndryshimi vjen me fakte jo me fjalë. E drejta për tu përmisuar ështe për këdo”, shkruan Kryemadhi.

Kujtojmë se krahas shpërthimeve me akuza ndaj SPAK dhe sistemit të drejtësisë kreu i PL-së ka folur edhe për revolucion kundër “xhimkave” në parti dhe atyre që sipas tij e kanë “tradhtuar”.

Meta drejt riformimit të PL-së, priten përjashtime dhe parti jo me “dy shoferë”

Nisin largimet në PL, dorëhiqet si nënkryetar Endrit Braimllari

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.