Përfaqësuesi i Lartë i Bashkimit Evropian (BE) për Politikë të Jashtme dhe Siguri, Josep Borrell, do të presë të hënën në kryqendren evropiane ministrat e jashtëm të shteteve të Ballkanit Perëndimor, ku pritet të adresohen sfidat aktuale gjeopolitike në fushën e sigurisë, mbrojtjes dhe politikës së jashtme.

Kryediplomatët e BE-së dhe Ballkanit Perëndimor, në margjinat e mbledhjes së Këshillit të BE-së të hënën, pritet të diskutojnë mbi mënyrat për të përmirësuar bashkëpunimin e përbashkët në dritën e “fërshëllimes” së zgjerimit. Gjithashtu, në fokus pritet të jetë edhe harmonizimi i plotë i vendeve të rajonit me politikën e përbashkët të jashtme dhe të sigurisë.

Ministrat e Jashtëm të Ballkanit Perëndimor pritet të zhvillojë diskutime për ngjyrimet gjeopolitike, veçanërisht mbi agresionin rus kundër Ukrainës, duke përqëndruar fokusin në angazhimet e sigurisë në rajon, por edhe do të shkëmbejnë mendime mbi situatën e përgjithshme në Lindjen e Mesme.

Krerët e diplomacisë së 27 shteteve anëtare të BE-së dhe shteteve të Ballkanit Perëndimor do të takohen më 24 qershor në Luksemburg, ndërsa pjesëmarrëse në këtë takim të nivelit të lartë pritet të jetë edhe Donika Gërvalla, ministre e Punëve të Jashtme dhe Diasporës së Kosovës (MPJD).

Përkundër se në agjendën zyrtare nuk përfshihet procesi i dialogut për normalizimin e marrëdhënieve midis Kosovës dhe Serbisë, jo zyrtarisht bëhet me dije se kjo çështje pritet të jetë gjithashtu një ndër temat për të cilat do të diskutojnë kryediplomatët evropianë në takimin ministror.

Sidoqoftë, tema kryesore pritet të jetë e ardhmja e politikës së zgjerimit të BE-së. Shqipëria, Bosnje-Hercegovina, Kosova, Mali i Zi, Maqedonia e Veriut dhe Serbia, synojnë të anëtarësohen në BE dhe janë në rrugë të ndryshme, ndërsa plani i rritjes së BE-së për Ballkanin Perëndimor përfshin investime prej 6 miliardë euro dhe akses në tregun e brendshëm në fusha të caktuara.

Nga gjashtë vendet e rajonit të Ballkanit Perëndimor, përveç Kosovës, të gjitha ose kanë statusin e kandidatit për anëtarësimin e ardhshëm në klubin eksluziv evropian, ose kanë nisur tashmë negociatat e pranimit. Kosova dorëzoi aplikacionin për anëtarësim në BE në vitin 2022, por blloku nuk e ka shqyrtuar akoma , kryesisht për shkak të tensioneve Prishtinë-Beograd.

Dhe kjo është vetëm një pasqyrë e shkurtër e agjendës së “maratonës diplomatike” të kësaj jave në ministerialin BE – Ballkani Perëndimor, i cili mbledh rreth vetes krerët e diplomacisë së kombeve të vogla ballkanike, në një kohë kur situata e sigurisë, kryesisht në Kosovë, Mal të Zi dhe Bosnje e Hercegovinë, ka ngritur alarmin në BE për nevojën e integrimit.