Kritikat e SHBA-ve për dinarin, Konjufca: Frikësohen se Serbia mund të reagojë, por Kosova po e shtrinë ligjin

Kryetari i Kuvendit të Kosovës, Glauk Konjufca, është pyetur nga gazetarët për kritikat e ashpra të Ndihmës-Sekretarit amerikan të Shtetit, James O’Brien për Qeverinë pas ndalimit të përdorimit të dinarit në komunat e banuara me shumicë serbe, derisa ka theksuar se amerikanët kanë drojë se Serbia mund të kundër reagojë.

“ShBA këtë proces e shohin shumë më shumë prej perspektives së sigurisë, domethënë ata frikësohen se Serbia mund të kundër reagojë dhe kjo e qet situatën prej kontrollit, ky është perceptimi i ShBA-së, kështu ka qenë gjithmonë”, tha Konjufca.

“Si e shohim ne, është e drejtë e shtetit të Kosovës të shtrijë sundimin e ligjit dhe sovranitetit në vend. Kjo është perspektivë më e ultë, më e ngushtë por është perspektivë e së drejtës së Kosovës”.

Ai ka theksuar se përkundër kritikave, marrëdhëniet ndërmjet Kosovës dhe Shteteve të Bashkuara të Amerikës “nuk janë për t’u shqetësuar” dhe “për të bërë panik”.

“E mirëkuptojmë plotësisht atë vërejtje edhe kritikat qe na japin ShBA, këto janë gjithmonë kritika me vend sepse ne ShBA e shohin Kosovën nivel shumë më të lartë se sa që e shohim ne, e shohin në rajon, e shohin edhe në Evropë e shohin edhe në kontekstin e përgjithshëm global”, potencoi ai.

Ndryshe, pas kritikave të ashpra nga ndërkombëtarët, më 13 shkurt, Banka Qendrore e Kosovës (BQK), ka bërë të ditur se faza e tranzicionit të zbatimit të rregullores së saj e cila e ndalon përdorimin e dinarit serb do të zgjasë tre muaj.

Lajmin e ka kumtuar BQK-ja përmes një komunikate për media, ku thuhet se kanë hartuar një plan të ri për zbatim të lehtësuar të efekteve të rregullores për operacione me para të gatshme në komunitete të caktuara.

“Veprime shtesë të cilat pritet të realizohen në një afat sa më të shkurtër, por jo më gjatë se tre muaj, në bashkëpunim edhe me bankat dhe institucionet tjera financiare”, është thënë nga BQK-ja.

Nga BQK-ja, kanë paraqitur 10 pika që do të përfshihen në këtë fazë të tranzicionit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.