Shqipëria

Krimi i organizuar/ Policia e Shtetit dhe Europol dakord për rritjen e bashkëpunimit dhe shkëmbimeve


Në kuadër të Konferencës së 51-të Rajonale të INTERPOL-it për Evropën, që po zhvillon punimet në Tiranë, Drejtori i Përgjithshëm i Policisë së Shtetit, Drejtues Madhor Muhamet Rrumbullaku zhvilloi një takim me Jean-Philipe Lecouffe, Zëvendësdrejtor Ekzekutiv i Europol-it.

Gjatë takimit u theksua bashkëpunimi shumë i mirë mes Policisë së Shtetit dhe Europol-it, si dhe u ra dakord për rritjen e shkëmbimeve në ndihmë të përpjekjes së përbashkët për goditjen e krimit të organizuar.

Rrumbullaku e falënderoi drejtuesin e Europol-in për kontributin e dhënë në disa operacione të përbashkëta, ndërsa nënvizoi rëndësinë që ka për Shqipërinë vazhdimi dhe intensifikimi i mëtejshëm i ndërveprimit mes agjencive të zbatimit të ligjit.

Zëvendësdrejtori Ekzekutiv i Europol-it vlerësoi rolin e Policisë së Shtetit dhe angazhimin për të dhënë një kontribut me vlerë në goditjen e krimit të organizuar.

Më herët, Policia e Shtetit dhe Sekretariati i Përgjithshëm i INTERPOL-it firmosën marrëveshjen e bashkëpunimit për përfshirjen e Shqipërisë në Rrjetin e Akademisë Globale të INTERPOL-it.

Marrëveshja u firmos nga Muhamet Rrumbullaku dhe Sekretari i Përgjithshëm i INTERPOL-it, Jurgen Stock.

Rrumbullaku falënderoi INTERPOL-in për bashkëpunimin në fushën e trajnimeve dhe theksoi se, bashkimi i Shqipërisë me Rrjetin e Akademisë Globale është një hap i rëndësishëm përpara për sistemin e arsimimit policor dhe vetë Policinë e Shtetit.

“Jemi të kënaqur, që në rrugëtimin e gjatë e të vështirë për të forcuar kapacitetet e Akademisë sonë të Sigurisë, do të kemi edhe angazhimin e Drejtorisë së Trajnimeve për Ngritjen e Kapaciteteve të INTERPOL, e cila ka krijuar Akademinë Globale. Synimet e saj për një qasje globale të trajnimit për zbatimin e ligjit do të jenë një ndihmë e madhe edhe për Shqipërinë”, u shpreh Drejtori i Përgjithshëm i Policisë së Shtetit.

Ai shtoi se, sot INTERPOL-i është një lider global në ndërtimin e trajnimin e kapaciteteve të zbatimit të ligjit ndërkombëtar dhe është me shumë vlerë që Policia e Shtetit Shqiptar i bashkohet edhe këtij komponenti të rëndësishëm.

Sekretari i Përgjithshëm i INTERPOL-it falënderoi Policinë e Shtetit për mikpritjen dhe organizimin e Konferencës Rajonale në Tiranë.

Jurgen Stock shprehu gatishmërinë e INTERPOL-it për shkëmbimin e përvojave policore me Shqipërinë.

Ndërkaq, presidenti i INTERPOL, Ahmed Naser Al-Raisi në konferencën Evropiane të zhvilluar në Tiranë nënvizoi se siguria globale mbetet prioritet.

Gjatë fjalës së tij ai theksoi se bashkëpunimet kundër luftës së krimit janë shumë të rëndësishme, ndërsa nënvizoi se mes INTERPOL dhe Evropës ka një bashkëpunim të mirë.

Më tej Ahmed Naser Al-Raisi vlerësoi edhe rolin e Shqipërisë, duke shtuar se ka treguar se është shembull i mirë i bashkëpunimit ndërkombëtar

“Kontributi i BE në projektet e INTERPOL është shumë i rëndësishëm. Rol kryesor ka edhe Komiteti Ekzekutiv i INTERPOL. Komiteti ekzekutiv evropian luan gjithashtu një rol të rëndësishëm dhe kontributet e tyre janë gjithashtu të rëndësishme. Këto bashkëpunime janë me rëndësi për sigurinë globale”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore