Fuqizimi i sektorit të peshkimit, në fokus të buxhetit 2022

Ministrja e Bujqësisë në Republikën e Shqipërisë, Frida Krifca, së bashku me kryeministrin e Shqipërisë, Edi Rama, kanë prezantuar buxhetin 2022 për peshkimin.

Krifca vuri në pah edhe një herë mbështetjen e qeverisë ndaj këtij sektori, i cili ka marrë hov zhvillimi të dukshëm që prej vitit 2013 e që është reflektuar edhe në raportin e Komisionit Evropian të këtij viti.

Duke u ndalur te Buxheti i 2022, Krifca bëri me dije se nëpërmjet Programit “Mbështetje për peshkimin” do të vihen në dispozicion 702 milionë lekë.

Gjithashtu, ministrja informoi se do të mundësohet rritja e kapaciteteve ankoruese të portit të Durrësit, për të akomoduar në mënyrë të sigurtë flotën më të madhe në vend që përben 60% te totalit.

Por jo vetëm, sipas Krifcës, investime do të kryhen edhe në rritjen e kapaciteteve ankoruese në portin e Shëngjinit, në ristrukturimin e qendrës shtetërore të Zvezdës në Korçë, si dhe do të vihet në dispozicion skema kombëtare e mbështetjes për të vazhduar me rinovimin e flotës së peshkimit.

Më tej, Ministrja u ndal tek potenciali që ka vendi ynë tek eksporti i açugeve. Sektor për të cilin, janë nisur negociatat me Bashkimin Evropian për rritjen e kuotave të açugeve të përpunuara.

“Prodhimi i përgjithshëm nga uji i ëmbël, uji i njelmët dhe mjedisi detar, është rritur gjatë viteve të fundit, nga 3 mijë e 450 ton në vitin 2012, në 8 mijë e 799 ton në vitin 2020”, vijoi prezantimin Krifca.

Nga ana tjetër, kryeministri i Shqipërisë, u shpreh se peshkimi është një nga sektorët ku ka shumë për të bërë, ka dhe shumë për të treguar.

Sipas tij është e rëndësishme “të mos harrojmë nga nisemi për të qenë të qartë se si mund të shkojmë aty ku duam të arrijmë”.

Rama solli në vëmendje të kaluarën e këtij sektori, ku peshkatarët niseshin në det të hapur për të marrë naftën në Itali.

“Nafta për ju ishte këtu në Shqipëri sikur do furnizonit anijet me xhetona”, tha ai.

Kryeministri ka njoftuar se vetëm këtë vit pritet të mbyllet vitin me 32 plus, subjekte të licensuara.

Rama ka ravijëzuar se eksporti është rritur me 239%.  Ai ka thënë se paga më e ulët që merr një punonjës në peshkim është 800 mijë lekë.

“Të gjithë kanë nevojë për punëtorë peshkimi, se është ekonomi që po rritet dhe do të vazhdojë të rritet”, u shpreh numri një i Qeverisë.

Sipas tij, në këtë sektor po vijnë për të punuar qytetarë nga Turqia dhe Egjipti.

Rama ka premtuar mbështetje financiare në dy drejtime, një fond nga Ministria e Bujqësisë që do të financojë i drejtpërdrejtë këdo që thotë se ka nevojë të riparoj anije.

Ky fond do te jetë lek në dorë dhe jo borxh.

Ai ka kërkuar që Fondi i garancisë sovrane që ka vënë Ministria, të vihet në lëvizje, kështu kur të kërkohet kredi në bankë duhet të merret nga fondi i garancisë sovrane.

Numri një i Qeverisë ka njoftuar se do të ndërtohet një shkollë profesionale për specialistët e peshkimit.

Po ashtu, biznesmeni Gjergj Luca, i ka bërë thirrje ministres që të vijojë puna për këtë sektor, pasi ka shumë potencial.

Ai ka kërkuar krijimin e një markate, në të cilën të çohet peshku, por kjo sipas tij, kërkon krijimin e një infrastrukture.

Në fjalën e tij Rama, njoftoi se vitin e ardhshëm do të nisë dhe krijimi i markatës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.