Krasniqi takon Orav-in, flasin për çështjet me interes të përbashkët

Kryetari i Partisë Demokratike të Kosovës (PDK), Memli Krasniqi, ka takuar të martën shefin e ri të zyrës së Bashkimit Evropian në Prishtinë, Aivo Orav, me të cilin kanë diskutuar për çështjet me interes të përbashkët.

“Pa dyshim, ardhja e ambasadorit Orav në Kosovë, i cili ka një përvojë mbi 30 vjeçare në diplomacinë evropiane, e posaçërisht atë të Ballkanit, është lajm i mirë për vendin tonë”, shkroi Krasniqi në Facebok.

Ai bëri me dije se me diplomatin evropian ka diskutuar dhe ndarë pikëpamjet e tyre për çështje të interesit të përbashkët, në funksion të avancimin e proceseve integruese të Kosovës.

“Për shtetin tonë integrimi euro-atlantik mbetet prioritet i pazëvendësueshëm”.

Lideri i opozitës potencoi se ambasadorit Orav ia ka konfirmuar përkushtimin e plotë të PDK-së për të kontribuar në thellimin e raporteve diplomatike dhe politike, të cilat, siç thotë ia, “garantojnë rrugëtimin e sigurt të Kosovës drejt BE-së”.

Gjatë ditës, Orav është takuar edhe me Kryetarin e Lidhjes Demokratike të Kosovës (LDK), Lumir Abdixhiku.

Abdixhiku e njofton ambasadorin e ri të BE-së në Prishtinë me qëndrimet e LDK-së

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.