Krasniqi: Përkushtimi i Blairit për liri dhe drejtësi, frymëzim për të gjithë

Kryetari i Partisë Demokratike të Kosovës (PDK), Memli Krasniqi, pas takimit që ka zhvilluar me ish-kryeministrin e Mbretërisë së Bashkuar, Tony Blair ka thënë se i ka shprehur mirënjohje për mbështetjen e vazhdueshme që ka dhënë për Kosovën.

Krasniqi, përmes një shkrimi në rrjetin social ‘Facebook’, takimin me Blairin e ka përshkruar si “të veçantë” dhe “emocionues”.

“Roli i tij historik për vendin tonë dhe përkushtimi i palëkundur për të mbrojtur lirinë dhe drejtësinë ka qenë një frymëzim për të gjithë ne, tash e një çerek shekulli”.

“Biseda jonë e sotme nënvizoi edhe një herë rëndësinë e bashkëpunimit të mirë ndërkombëtar, krijimit të partneriteteve dhe kultivimit të raporteve të besueshme – në funksion të sigurimit të paqes, stabilitetit dhe  integrimit euro-atlantik të vendit tonë”, ka shkruar Krasniqi.

Duke thënë se përkrahja e tij ndaj Kosovës, kishte ardhur pikërisht në kohën kur ishte më së shumti e nevojshme.

“Ish-Kryeministrit Blair i shpreha mirënjohjen e përjetshme të popullit tonë për mbështetjen e tij të vazhdueshme për Kosovën, posaçërisht atëherë kur kishim më së shumti nevojë”.

“Kosova nuk do të harrojë asnjëherë liderishipin tuaj, zotëri Kryeministër!”.

Blair, gjatë ditës është takuar me presidenten e Kosovës, Vjosa Osmani, kryetarin e Kuvendit Glauk Konjufca, kryeministrin Albin Kurti, kryetarin e Aleancës për Ardhmërinë e Kosovës, Ramush Haradinaj.

Ndërsa nga kryetari i Prishtinës, Përparim Rama, Blairit i është dhuruar “Çelësi i Qytetit”, e po ashtu është shpallur “Qytetar nderi i Kryeqytetit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.