Krasniqi për hetimet nga Task-Forca: S’kam pranuar asnjë ftesë nga organet hetuese

Ministri i Administrimit të Pushtetit Lokal, Elbert Krasniqi, i pyetur nga gazetarët se “a është nën hetime nga Task-Forca kundër korrupsionit në kuadër të Policisë së Kosovës”, ka mohuar këto raportime.

Ai në një konferencë për media të përbashkët me kryeministrin e Kosovës, Albin Kurti, ka thënë se është informuar nga mediat lidhur me hetimet që po bëhen, ndërsa deri tani ai nuk ka pranuar asnjë ftesë nga organet e drejtësisë.

“Fatkeqësisht të gjitha ato që ne i dimë janë ato që i kuptojmë nga mediat. Unë s’kam informacione më shumë mbi ato hetime potenciale, këtë e kemi kuptuar nga një portal që është ‘Betimi për Drejtësi”.

“Sidoqoftë nuk kam pasur asnjë ftesë nga asnjë organ hetues që të intervistohem dhe të pyetem rreth kësaj çështje”, ka thënë Krasniqi.

Teksa i pyetur për kryetarin e Komunës së Leposaviqit, Lulzim Hetimi, nëse ka dalur nga objekti ka thënë se në vend të kësaj pyetje duhet të ketë interesim më të madh për punën e kryetarit të komunës së Mitrovicës së Veriut, Erden Atiç.

“S’jemi duke diskutuar për një komunë që mund të zhvillohen aktivitete sikurse edhe në komunat tjera”.

“Shpeshherë më mirë për t’u përgjigjur në pyetjen se çfarë po bën Lulzim Hetemi, në komunën e Leposaviqit, duhet ta shohim se çfarë po bën Erden Atiç, në komunën e Mitrovicës së Veriut, i cili ka dëshmuar në këto dy muaj se është kryetar i vetëm që është interesuar në përmirësimin e jetës së qytetarëve dhe është në shërbim të qytetarëve dhe jo të grupeve kriminale”.

Për takimet e kryeministrit me kryetarët e komunave në Veri, Krasniqi sqaroi se ata kanë qenë të ftuar në takimin ku ishin ftuar kryetarët e komunave të Kosovës.

“Ne e kemi pasur takimin e fundit me të gjithë kryetarët e komunave të Kosovës, në të cilin kanë qenë pjesë edhe kryetarët e komunave veriore. Ata që kanë pasur mundësi të jenë aty kanë diskutuar me kryeministrin”.

Ai ka thënë se takimet e tij me kryetarët janë të shpeshta.

“Unë vazhdimisht i takoj të gjithë kryetarët, por sigurisht që me kryetarët që punojnë në zyrë alternative kam edhe më pak mundësi që të zhvilloj punë dhe procedura. Sa i përket kryetarit Lulzim dhe Erden, jemi në koordinim dhe komunikim të rregullt, ju e dini që të dy kryetarët kanë emëruar një emëruar një pjesë të konsiderueshme të ekipit të tyre”.

“Po ju informoj që në komunën e Leposaviqit tashmë janë tetë drejtor të emëruar nga kryetari, Lulzim Hetemi, gjashtë nga ta janë nga përkatësia etnike serbe dhe dy janë shqiptarë”.

Pas mbajtjes së zgjedhjeve në Veri të Kosovës më 23 prill, situata ishte përkeqësuar pasi serbët lokalë në komunat në veri të Kosovës – Zveçan, Leposaviq dhe Zubin Potok – kanë kundërshtuar hyrjen e kryetarëve të rinj shqiptarë, me asistimin e Policisë së Kosovës, në ndërtesat komunale.

BE-ja kishte vendosur masa ndaj Kosovës në fund të qershorit, pas përkeqësimit të situatës në Veri të Kosovës dhe mos-gatishmërisë së Qeverisë për të shtensionuar situatën në këtë pjesë të vendit sipas kërkesave të Unioni.

Pas trazirave që ndodhen ku u lënduan pjestarë të KFOR-it, të Policisë dhe gazetarë, Bashkimi Evropian ka propozuar një plan tre-pikësh.

Ky plan parasheh tërheqjen e njësive elitare të Policisë së Kosovës nga afërsia e ndërtesave komunale në Veri, tërheqjen e kryetarëve të rinj shqiptarë nga ndërtesat komunale, shpalljen e zgjedhjeve të parakohshme atje dhe garancën e serbëve lokalë se do të marrin pjesë në zgjedhje.

Kosova dhe Serbia kanë dhënë dakordimin e tyre për Aneksin Zbatues të Planit Evropian për rrugën drejt normalizimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.