Krasniqi: Në dy komuna po përmbyllet me sukses procesi i ndërtimit të shtëpive për komunitet joshumicë

Ministri i Administrimit të Pushtetit Lokal, Elbert Krasniqi, ka thënë se në dy komuna të Kosovës është duke u përmbyllur me sukses ndërtimi i shtëpive për familjet përfituese në kuadër të këtij dikasteri.

Lajmin e ka bërë të ditur Krasniqi përmes një shkrimi në rrjetin social ‘Facebook’.

“Në Gjakovë dhe në Ferizaj, po përmbyllet me sukses procesi i ndërtimit të shtëpive për familjet përfituese të thirrjes së MAPL-së për ndërtimin e shtëpive për komunitetet jo shumicë në Komuna”.

“Familjet Bala, Mamusha, Luma dhe Kryeziu nga Gjakova dhe familja Krasniqi nga Ferizaji po fillojnë një kapitull të ri në jetën e tyre duke u bërë me shtëpi të reja”, ka shkruar ai.

Më 12 dhjetor, kryeministri i Kosovës, Albin Kurti, kishte njoftuar se 380 familje të komuniteteve joshumicë do të përfitojnë ndihmë financiare për materiale ndërtimore, duke bërë strehimin “prioritet kryesor” të qeverisë së tij.

Më 19 tetor, Krasniqi, kishte njoftuar se edhe në Veri ka nisur ndërtimi i shtëpive për familjet përfituese nga thirrja e MAPL-së për ndërtimin dhe renovimin e shtëpive.

Bashkë me Ministrin e Punëve të Brendshme, Xhelal Sveçlën, ata kishin vizituar familjet përfituese.

“Projekti për ndërtimin e shtëpive nga MAPL është një nga projektet qeveritare për ndërtimin e shtëpive duke pas parasysh edhe shtëpitë të cilat do të ndërtohen në lagjen Kroi i Vitakut nga MMPHI”, kishte shkruar ai në tetor.

Më 22 nëntor, edhe 1 milionë euro shtesë ishin ndarë për ndërtimin e shtëpive në katër komunat veriore janë ndarë nga Qeveria e Kosovës, në mbledhjen e të mërkurës.

Kryeministri i Kosovë, Albin Kurti, kishte sqaruar se ky subvencionim po bëhet për nevojën shtesë që kanë komunat veriore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.