Kryetari i Partisë Demokratike të Kosovës (PDK), Memli Krasniqi, pas nisjes së procesit të regjistrimit të bashkatdhetarëve të cilët dëshirojnë të votojnë në ambasadat dhe  konsullatat ka ftuar diasporën që të votojnë kandidatin e PDK-së për kryeministër, Bedri Hamza, duke thënë se Kosova mund të rikthehet në kursin e zhvillimit.

“Vetëm bashkë, duke votuar Bedri Hamzën për Kryeministër, mund ta rikthejmë atdheun tonë të përbashkët, Kosovën, në kursin e zhvillimit dhe integrimit”, ka shkruar Krasniqi rrjetin social ‘Facebook’.

Krasniqi, ka thënë se PDK-ja do të jetë e angazhuar për ta lehtësuar këtë proces.

“Prandaj, sot, ju ftoj të gjithëve që, duke u regjistruar përmes platformës së KQZ-së, t’ia mundësoni vetes të drejtën tuaj të votës për zgjedhjet e ardhshme”.

Komisioni Qendror i Zgjedhjeve (KQZ), ka vlerësuar se Ministria e Punëve të Jashtme dhe Diasporës (MPJD), ka kërkuar një numër të madh të vendvotimeve për mërgimtarët – sipas KQZ-së për diasporën duhet të jenë 47 vendvotime.

Anëtari i KQZ-së nga radhët e Lëvizjes Vetëvendosje, Sami Kurteshi, ka thënë se sekreteriati i KQZ-së ka përgatitur një listë të përfaqësive diplomatike e që s’përputhet me numrin e MPJD-së.

Ai ka kërkuar që të hapet platforma për regjistrimin e mërgimtarëve që nga e enjtja  në mënyrë që ata të deklarohen se në cilën formë dëshirojnë të votojnë.

Më 9 shkurt të 2025, do të mbahen zgjedhjet e reja parlamentare në Kosovë.