KQZ-ja do t’i publikojë shpenzimet e subjekteve politike për fushatën e zgjedhjeve gjatë javës

Komisioni Qendror i Zgjedhjeve (KQZ), gjatë kësaj jave pritet të publikojë dosjen e informimit publik për subjektet politike dhe kandidatët e zgjedhur e cila u takon Zgjedhjeve Lokale 2021.

Dosje kjo e cila përmban regjistrin e donatorëve të secilit subjekt politik, raportet e publikimit financiar të fushatës zgjedhore të subjekteve politike dhe formularët e publikimit financiar për kandidatët që kanë arritur të zgjedhën.

Mirëpo, këto raporte ende nuk janë audituar, prandaj sipas KQZ-së, publikimi i këtyre të dhënave do të shoqërohet me tekstin se, “raportet financiare të fushatës janë të paaudituara dhe mund të pësojnë ndryshme dhe saktësime gjatë procesit të auditimit”.

Në mbështetje të publikimit të kësaj dosjeje dolën anëtarët e KQZ-së, pasi sipas tyre i shërben transparencës dhe praktikës që po ndjek institucioni për disa vite me radhë.

Po ashtu, anëtarët e KQZ-së u njoftuan lidhur me mospagesat për më shumë 500 persona të stafit, të cilët kanë qenë të angazhuar në raundin e dytë të zgjedhjeve lokale 2021.

KQZ, konsideron se këto raste janë paraqitur për shkak të gabimeve në numrat e llogarive dhe rastet e tilla nuk kanë mundur të procesohen nga bankat komerciale për shkak të gabimeve në numrat e llogarive.

Dokumentacioni i saktë dhe i nevojshëm është kompletuar dhe aktualisht, sekretariati i KQZ-së është duke identifikuar linjat buxhetorë nga të cilat do të merren mjetet për t’i realizuar këto pagesa.

Më 19 janar, Komisioni Qendror i Zgjedhjeve (KQZ) ka miratuar kërkesat e gjashtë subjekteve politike për shtyrjen e kuvendeve zgjedhore, përfshi edhe partinë në pushtet, Lëvizjen Vetëvendosje (LVV).

Në një njoftim të KQZ-së thuhet se në vitin 2022 janë planifikuar të mbahen 14 kuvende zgjedhore të partive politike, por për shkak të gjendjes pandemike dhe masave kufizuese për tubimet, Zyra ka pranuar disa kërkesa për shtyrjen e afateve për mbajtjen e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.