Shqipëria

KQZ apel qytetarëve: Verifikoni emrin në listën e zgjedhësve


Komisioni Qendror i Zgjedhjeve (KQZ), të mërkurën, u bëri apel qytetarëve, që kanë të drejtë vote, të verifikojnë emrin e tyre në listën e zgjedhësve. Po ashtu dhe vendodhjen e qendrës së tyrë të votimit.

Kontrolli mund të bëhet duke klikuar në rubrikën; “Lista e Zgjedhësve”, në faqen e internetit të KQZ-së, ose të Ministrisë së Brendshme të Shqipërisë.

Në njoftim thuhej, në rast se konstatohet parregullsi tek të dhënat e qytetarëve, duhet të paraqiten, menjëherë, pranë zyrës së Gjendjes Civile, në Njësinë përkatëse Administrative.

Gjithashtu, KQZ-ja, u solli në vëmendje qytetarëve, të cilëve ju ka mbaruar ose ju mbaron afati i vlefshmërisë së dokumentit të identifikimit, të aplikojnë për rinovimin e tyre brenda datës 25 prill.

Sipas rregullave të KQZ-së, procesi i votimit nuk mund të kryhet pa një mjet identifikimi të vlefshëm në ditën e zgjedhjeve.

Më herët, edhe ambasadori i Bashkimit Evropian, Luigi Soreca, bashkë me ambasadoren amerikane, Yuri Kim, iu bënë thirrje qytetarëve, për rinovimin e mjetit të identifikimit, nëse u kanë skaduar.

Në zgjedhjet e 25 prillit 2021, synohet të implementohet identifkimi elektronik i zgjedhësve. Prandaj mjeti i identifikimit është i domosdoshëm.

KQZ-ja, njoftoi se “të votosh është e drejtë dhe përgjegjësi qytetare”. /AlbanianPost.com

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore