Ish-administratori i Organizatës së Kombeve të Bashkuara për Kosovën pas çlirimit saj, Bernard Kouchner, të martën do qëndrojë për vizitë në Kosovë dhe në një ceremoni solemne do të nderohet me Çelësin e Qytetit.

“Ju ftojmë të merrni pjesë në ngjarjet e planifikuara me rastin e vizitës së Dr. Bernard Kouchner në Kryeqytetin Prishtina më datë 11 qershor 2024”, thuhet në njoftim për media.

Po ashtu, ai do të takohet edhe me kryetarin e Prishtinës, Përparim Rama, derisa një rruge do t’i vendoset emri i tij.

Nga viti 1999 deri në vitin 2001, Kouchner ka mbajtur pozitën e Përfaqësuesit Special të Organizatës së Kombeve të Bashkuara në Kosovë.

Ndërkaq nga viti 2007 deri në vitin 2010, diplomati francez ishte ministër i Punëve të Jashtme në Francë.

Ndryshe, në Kosovë për vizitë po qëndron edhe ish-kryeministri i Mbretërisë së Bashkuar, Tony Blair. Ai nga Prishtina u ka bërë thirrje të gjitha shteteve që ende nuk e kanë njohur ta bëjnë këtë.

Ndërhyrja humanitare e NATO-s më 1999 konsiderohet një ndër sukseset më të rëndësishme të aleancës ushtarake të udhëhequr nga SHBA-ja, përkundër se përbente rastin e parë në histori që NATO-ja ndërmerrte një veprim ushtarak në territorin evropian.

Bombardimet e NATO-s mbi Serbinë përfunduan pas 78 ditëve, ndërsa lufta në Kosovë pas 14 muajve.