Kosovë: Qeveria miraton masat e reja anti-COVID

Qeveria e Kosovës në mbledhjen e të martes ka miratuar masat e reja anti-COVID.

Në arsyetimin e Qeverisë thuhet se masat e reja janë ndërmarrë pas paraqitjes së variantit të ri Omicron.

Edhe me vendimin e masave të reja, maska mbetet obligative, me përjashtim të rasteve kur je duke drejtuar veturën i vetëm apo ke anëtarë të familjes në veturë, gjatë vrapimit e ushtrime fizike apo gjatë ngrënies apo pijes.

Ndërkaq, vazhdon të ndalohet hyrja pa maskë në ambiente të mbyllura.

Edhe, kufizimi i qarkullimit vazhdon të jetë nga ora 00:00 deri në ora 5:00 të mëngjesit. Me përjashtim të rasteve të caktuara.

Po ashtu gjithë përfituesit nga skemat sociale e pensionale janë të liruar nga paraqitja e rregullt.

Ndërkohë janë ndaluar veprimtaria e klubeve të natës dhe organizimi i festivaleve, koncerteve, ekskursioneve, pelegrinazheve, dasmave, fejesave, ahengjeve familjare e shoqërore.

Gastronomia lejohet deri 50 për qind të kapacitetit në hapësira të mbyllura e deri 70 për qind në të hapura.

Shërbimet e gastronomisë lejohen nga ora 5:00 deri në orën 23:00, ndërsa muzika lejohet deri në orën 21:30.

Në taksi lejohet të udhëtohet vetëm me dy udhëtarë.

Në masat e reja anti-COVID të Qeverisë së Kosovës, gjithë personat që hyjnë në Kosovë nga 3 janari e tutje duhet të kenë dëshminë e vaksinimit.

Deri në atë datë, personat që hyjnë në Kosovë lejohen me dëshmi vaksinimi, të jenë një dozë të vaksinës së bashku me testin PCR jo më të vjetër se 48 orë apo një dozë të vaksinës së bashku me dëshminë se e ka kaluar COVID-19.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.