Kosovë: IKSHPK-ja i rekomandon presidentes shtyrjen e zgjedhjeve

Instituti Kombëtar i Shëndetësisë Publike të Kosovës (IKSHPK), i ka rekomanduar presidentes së vendit Vjosa Osmani, që të shtyhen zgjedhjet lokale që do të mbahen më 17 tetor.

Në letrën e adresuar nga IKSHPK-ja është thënë se mbajtja e zgjedhjeve lokale paraqet rrezik për rritjen e numrit të të infektuarve me COVID-19.

“Mbajtja e procesit zgjedhor paraqet rrezik për përhapjen dhe rritjen e infeksionit me COVID-19 e si pasojë edhe rritje të rrezikut të rasteve me fatalitet”.

Prandaj, rekomandimi i IKSHPK-së është që të ndalohen të gjitha aktivitetet publike që mund të ketë pasoja dhe rritje të rrezikut të rasteve me fatalitet.

“Rekomandojmë shtyrjen e procesit zgjedhor, përkatësisht ndalimin e aktiviteteve publike, grumbullimit të qytetarëve dhe tubimet publike të të gjitha llojeve”.

Ky vendim i IKSHPK-së dhe rekomandim pastaj për presidenten vjen pas një analize  të situatës aktuale epidemiologjike të rasteve me COVID-19, thuhet në letrën e IKSHPK-së.

Gjithashtu, janë marrë parasyesh edhe e rastet e hospitalizuara dhe vdekjeve nga SHSKUK dhe spitalet rajonale, dhe profeksioneve për muajin shtator deri në fillim të tetorit.

Letra do të jetë temë e diskutimit të hënë, kur Osmani do të mbajë takim me përfaqësues të partive politike për të diskutuar lidhur me ndikimin e procesit zgjedhor në situatën epidemiologjike në vend.

Sipas letrës së Osmanit dërguar partive, ky takim do të mbahet konkretisht për të diskutuar opinionin profesional dhe rekomandimin e Task Forcës së Institutit Kombëtar të Shëndetësisë Publike të Kosovës lidhur me ndikimin e zgjedhjeve në situatën epidemiologjike.

Takimi do të mbahet të hënën, nga ora 16:30 në ndërtesën e Kuvendit të Kosovës.

Afati i fushatave zgjedhore – nëse asgjë nuk ndryshon – do të fillojë me 16 shtator dhe do të zgjasë deri më 15 tetor, mirëpo shkaku i pandemisë COVID-19 ende nuk dihet se si do të zhvillohen këto fushata zgjedhore nga partitë politike.

Për pjesëmarrje në zgjedhjet lokale që do të mbahen më 17 tetor kanë aplikuar 94 subjekte politike, prej tyre, 32 parti, një koalicion, 35 iniciativa qytetare dhe 26 kandidatë të pavarur.

Numri i përgjithshëm i kandidatëve që kanë aplikuar është 4 mijë e 920, prej tyre 165 për kryetarë komunash dhe 4 mijë e 757 për kuvende komunale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.