Kosovë: 18.287 raste aktive me COVID-19

Numri i rasteve të reja me COVID-19 në Kosovë po vazhdon të thyejë rekorde.

Sipas Ministrisë së Shëndetësisë, gjatë 24 orëve të fundit kanë rezultuar pozitivë me koronavirus 2,279 persona nga 12,666 testime të kryera, ndërkohë që, janë regjistruar 8 raste të vdekjes.

Numri i rasteve aktive aktualisht në Kosovë është 18,287.

Ndërkaq, sa i përket vaksinimit, prej fillimit të këtij procesi në fund të muajit mars, në të gjitha qytetet e Kosovës janë dhënë 687,553 doza të vaksinës.

Deri më tani 234.731 qytetarë janë vaksinuar me dozën e dytë.

Instituti Kombëtar i Shëndetësisë Publike të Kosovës(IKSHPK), pas publikimit të numrit të rasteve me COVID-19, ka kërkuar nga qytetarët që të vaksinohen dhe të mbrohen nga varianti Delta i Coronavirusit.

“Delta varianti po vazhdon të shënon përhapet me shpejtësi në Kosovë! Virusi bartet shumë shpejt prej një personi në dhjetëra persona tjerë me pasoja që në të shumtën e rasteve mund të jenë fatale e që fatkeqësisht preken edhe fëmijët!”, thuhet në njoftimin e IKSHPK-së.

Kurse nga data 20 gusht për të parandaluar përhapjen e COVID-19, Qeveria e Kosovës i ka shtrënguar masat, ka ndaluar veprimtarin e klubeve të natës, ahengjet familjare dhe mbrëmjet e maturës.

Po ashtu maska është bërë obligative për të bartur gjatë gjithë kohës në ambiente të mbyllura.

Këto masa vlejnë deri më 1 shtator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.