Kosova për herë të parë ftohet nga Emiratet e Bashkuar në Konferencën e Palëve

Presidentja e Kosovës, Vjosa Osmani ka pranuar ftesë zyrtare nga presidenti i Emirateve të Bashkuara Arabe, Mohamed Bin Zayed Al Nahyan për të marr pjesë në takimin e liderëve në kuadër të Konferencës COP28.

Konferencë kjo e cila është e nivelit të lartë dhe organizohet nga Kombet e Bashkuara me fokus në ndryshimet klimatike, teksa është hera e parë që Kosova është ftuar në një lloj të këtij takimi.

Lajmi është bërë i ditur përmes një komunikate për media.

“Presidentja Osmani priti në takim Ambasadoren jorezidente të Emirateve të Bashkuara Arabe, znj. Nabila Al Shamsi, e cila ia dorëzoi personalisht ftesën për këtë konferencë. Presidentja Osmani theksoi se ky është një moment jashtëzakonisht i rëndësishëm për Kosovën, duke qenë se është hera e parë që Republika e Kosovës po ftohet zyrtarisht dhe po trajtohet si palë e barabartë”.

“Ajo theksoi se Kosova ka gatishmëri të plotë për t’u angazhuar në mënyrë sa më aktive në çështjet që kanë të bëjnë me luftimin e ndryshimeve klimatike dhe se, si e tillë, Kosova duhet të jetë pjesë e çdo tryeze ku diskutohet për këtë temë jashtëzakonisht të rëndësishme e shqetësuese, jo vetëm për shtetin tonë”, thuhet në komunikatë.

Teksa është thënë se nikoqir i COP28 këtë vit janë Emiratet e Bashkuara Arabe dhe konferenca do të mbahet në fund të nëntorit dhe fillim të muajit dhjetor të këtij viti.

COP28 është shndërruar tashmë në takimin kryesor të liderëve botërorë, në cilën diskutohen problemet dhe sfidat në fushën e ndryshimeve klimatike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.