Kosova ndalon spiunen ruse – Sveçla: Po provojmë të zbardhim qëllimet e saj

Autoritetet e Kosovës kanë ndaluar Daria Aslamovan, spiune e inteligjencës ushtarake ruse, e cila po provonte të hynte në Kosovë nga pika kufitare në veri të Kosovës.

Ministri i Punëve të Brendshme të Kosovës, Xhelal Sveçla, ka dhënë detaje e ndalimit të saj.

“Sot, në pikë kalimin kufitar në veri të vendit është ndaluar Daria Aslamova. Shumë shtete e kanë vërtetuar se ajo ka qenë e angazhuar në spiunazh për inteligjencën ushtarake ruse dhe se ka vepruar në petkun e gazetares”, ka shkruar Sveçla në llogarinë e tij në Facebook.

Aslamova është edhe pjesëmarrëse në luftimet në Ukrainë duke propaganduar mbi pushtimin rus ndaj Ukrainës.

“Autoritetet e Republikës së Kosovës kanë qenë në dijeni për veprimtarinë e saj por edhe se në disa shtete ajo e ka të ndaluar të hyjë për shkak të veprimtarisë së saj. Me këtë rast, ajo është ndaluar dhe po vazhdon angazhimi i akterëve përkatës deri në zbardhje të qëllimeve të saj”, shpjegon Sveçla.

Ministri e ka lidhur ardhjen e saj në Kosovë me tensionet e fundit në Veri.

“Theksojmë faktin se ajo tenton të hyjë në Republikën e Kosovës një javë pas tensioneve të shkaktuara nga strukturat kriminale në veri të vendit dhe në të njëjtën ditë kur të njëjtat struktura që orkestrohen nga Vuçiç-i kanë shtënë rreth 10 herë drejt zyrtarëve tanë policor”.

“Tentimi i saj për të hyrë në vendin tonë përveç që përkon me zhvillimet në veri të vendit, i dëshmon qartë lidhjet dhe propagandën ruse të cilës i është bashkuar tashmë Serbia dhe që kanë për qëllim destabilizimin e vendit tonë”, shkruan ministri.

“Pas këtij bekimi s’frikësohem të shkoj në betejë”, spiunia ruse që u ndala Kosovë disa orë më herët pati një takim në Beograd

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.