Kosova kërkon nga Mali i Zi që t’i lejojë fëmijët ta kalojnë kufirin me certifikatë të lindjes

Ministrja e Industrisë, Ndërmarrësisë dhe Tregtisë, Rozeta Hajdari, në një prononcim për agjencinë kosovare të lajmeve “Kosova Press”, konfirmoi se kanë kërkuar nga Mali i Zi që fëmijëve nën moshën 16 vjecare t’iu lejohet kalimi i kufirit me certifikatë të lindjes.

“Ne jemi në kontakt të afërt me homologët tanë. E kam takuar personalisht zëvendësministrin e Ekonomisë dhe Turizmit nga Mali i Zi, Armend Milla. E kam paraqitur këtë kërkesë dhe është përgjigjur në mënyrë pozitive se do të kenë parasysh konsideratë për turistët tanë, sidomos gjatë sezonit të verës”.

“Është në interes jo vetëm me Malin e Zi, por edhe me Shqipërinë, Maqedoninë, Bosnjën dhe me të gjitha vendet e rajonit që të kemi një ofertë turistike të përbashkët, por edhe lehtësira në kalimin kufitar të qytetarëve tanë. Pritet një përgjigje pozitive por ta shohim sa herët është kjo përgjigje”, tha Hajdari.

Mali i Zi në korrik të vitit 2022 ka pezulluar vendimin e mëparshëm në bazë të të cilit fëmijët nën moshën 18-vjeçare nga Republika e Kosovës, janë lejuar të kalojnë kufirin vetëm me certifikatë të lindjes, ndërsa me vendimin e ri kërkohet pasaporta edhe për fëmijët nën moshën 18-vjeçare.

Zëvendësministri i Turizmit në Mal të Zi, Armend Milla, apeloi te qytetarët e Kosovës që të respektojnë këtë vendim deri në një tjetër pasi kështu do të mund të shmangeshin tollovitë dhe keqkuptimet në pikët kufitare të Muriqanit dhe Sukubinës.

“Normalisht duhet respektuar ligjet dhe ajo është çështje kryesore. Qeveria e Kosovës ka arritur në nivel ku pasaportat të jepen në një afat kohor sa më të shkurt dhe apeloj te të gjithë qytetarët që të mos presin momentin e fundit dhe të nxjerrin pasaportat për fëmijët e tyre”, tha Mulla.

Vendkalimi kufitar që lidh Malin e Zi me Shqipërinë në Sukobinë-Muriqan është pikë e përbashkët kufitare. Kjo pikë kufitare është mjaft e frekuentuar, veçmas gjatë muajve të verës. Qyteti shqiptar i Ulqinit është një nga destinacionet e preferuara për kosovarët gjatë muajve të verës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.