“Kosova ishte në terr informativ, kam punuar si gazetar vullnetar”, Bytyqi pyetet në Speciale për librin e tij

Gazetari Nuhi Bytyqi, gjatë dëshmisë së tij në Dhomat e Specializuara të Kosovës (DhSK), është pyetur për librin e tij “Libri i luftës”, i cili ishte promovuar në vitin 2019.

Ai është pyetur nga prokurori Matt Halling, rreth mënyrës se si e ka shkruar librin, datat që ka shkruar.

Bytyqi, është pyetur po ashtu nëse ka qenë gazetar i pavarur apo raportimet e tij kanë qenë të ndikuara nga ndokush, ai u përgjigj duke thënë se “në asnjë mënyrë s’kam lejuar që gjatë luftës e as pas luftës që dikush të ndikojë në punën time”.

Pjesë nga intervistimi i Nuhi Bytyqit nga prokurori Matt Halling:

Matt Halling: Në librin juaj, ka shumë data kështu që dua të ma shpjegoni se si keni pasur mundësi të mbani data ndërkohë që lufta vazhdonte?

Nuhi Bytyqi: Të them të drejtën në ato rrethana të luftës, unë si gazetar vullnetar ashtu siç ka qenë Ushtria Çlirimtare e Kosovës, ushtri vullnetare e mbështetur nga i gjithë populli i Kosovës, e jashtë saj. Kam punuar në rrethana të jashtëzakonshme dhe s’kam pasur mundësi të mbajë ditarë të rregullt të shkruaj datat dhe emrat e personave që kam intervistuar.

Kështu që edhe në deklaratën time para Prokurorisë në Prishtinë, më 30 dhe 31 korrik të vitit 2019, kam deklaruar se disa data dhe disa emra që janë në libër mund të mos jenë të sakta ose mund të mungojë ndonjë emër, por që nuk është i vërtetë apo i saktë, për arsyeje që nuk kam pasur mundësi të mbajë ditarë ashtu siç mund të mbajnë gazetaret në rrethana normale

Disa viteve pas luftës kam filluar ta rikthejë kujtesën time dhe në librin e luftës kam arritur t’i përfshijë të gjitha ngjarjet më të rëndësishme të cilat janë opinione të mija dhe nuk dua që kjo gjykatë e sidomos prokuroria këtë libër timin ta konsiderojë si një dëshmi për të akuzuar luftëtarët e lirisë.

Matt Halling: Gjatë luftës a keni vepruar apo funksionuar si gazetarë i pavarur gjatë gjithë kohës?

Nuhi Bytyqi: Unë kam punuar si gazetarë vullnetarë, duke konsideruar se Kosova ishte në një terr informativ që nga viti 1990, kur procesi mbylli Radio Televizionin e Prishtinës, gazetën Rilindja dhe media të tjera dhe unë konsiderova që e kam obligim të japë informimin tim e opinionit shqiptarë sidomos në zonat e luftës, por edhe tek ndërkombëtaret.

Matt Halling: Qëllimi i punës suaj, a ishte që të raportonit në mënyrë objektive faktet dhe zhvillimet e luftës?

Nuhi Bytyqi: Qëllim i çdo gazetari të pavarur siç isha unë dhe kolegët e mi ishte ky.

Matt Halling: A jeni përpjekur ta pasqyroni luftën e Ushtrisë Çlirimtare të Kosovës, siç ishte në realitet kjo luftë?

Nuhi Bytyqi: Lufta e Ushtrisë Çlirimtare e cila ishte luftë për liri, ishte luftë kundër pushtimit serb, ishte luftë kundër dhunës dhe territorit të ushtrisë së policisë serbe që ushtronin në mbarë Kosovën dhe mjetet paqësore ishin shterur dhe kjo ishte luftë e imponuar të cilës ju bashkëngjiten të gjithë shqiptarët sidomos nga mosha e re nga Kosova e viset e tjera etnike shqiptare.

Kosova, s’ishte shtet dhe nuk e kishte ushtrinë e vet siç i kishin shtetet e tjera në rrethana normale.

Matt Halling: A ka ndryshuar apo a e ka manipuluar ndokush raportimet e juaja në mënyrë që të pasqyronte realitetin në mënyrë të shtrëmbuar?

Nuhi Bytyqi: Në asnjë mënyrë s’kam lejuar që gjatë luftës e as pas luftës që dikush të ndikojë në punën time.

Matt Halling: A i keni dhënë një kopje të librit tuaj ish anëtarëve të shtabit të përgjithshëm të UÇK-së, që janë përmendur në këtë libër?

Nuhi Bytyqi: Para botimit librin tim e kanë parë vetëm redaktorët, kuptohet edhe lektorja e librit as nga shtabi i përgjithshëm e as ndonjë qytetar tjetër i Republikës tekstin tim për botim se ka parë.

Matt Hallign: Pas botimit, a i keni dhënë ndonjë kopje të librit tuaj në ndonjë prej ish anëtarëve të shtabit të përgjithshëm të UÇK-së që përmenden në librin tuaj?

Nuhi Bytyqi: Po, pas botimit presidentit Hashim Thaçi, ia kam dhuruar librin, të tjerët nuk më kujtohen. E di që zotërit Selimi dhe zotërit Veseli nuk ua kam dhuruar, por edhe Fatmir Limaj, ma kishte kërkuar dhe ia kisha dhuruar.

Matt Halling: A keni marrë ndonjë koment lidhur me librin nga ndonjë anëtarët e shtabit të përgjithshëm të UÇK-së pas botimit të librit?

Nuhi Bytyqi: Jo s’kam marrë ndonjë koment. Ato ishin botimet e mija si gazetarë, e jo si historian.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.