Lajme

Kosova e Serbia mund të kenë takim “privat” në OKB


Ilustrim

Zvarritja e zbatimit të marrëveshjeve ekzistuese brenda dialogut Kosovë-Serbi, mund të jetë shkasë që Këshilli i Sigurimit të Organizatës së Kombeve të Bashkuara, të organizojë një takim jo-formal apo edhe privat në mes të zyrtarëve nga Kosova dhe Serbia me ndërmjetësim të përfaqësuesve të Bashkimit Evropian, përkatësisht Josep Borrell dhe Miroslav Lajçak.

Kështu të paktën thuhet në një komunikatë zyrtare të publikuar nga ana e Këshillit të Sigurimit të OKB-së.

Seanca e radhës e Këshillit të Sigurimit të OKB-së në të cilën do të shqyrtohet raporti i rregullt gjashtëmujor i Sekretarit të Përgjithshëm të OKB-së, Antonio Guterres, për situatën në Kosovë pritet të mbahet më 18 tetor.

Megjithatë seanca në fjalë mund të ketë një veçori dalluese për dallim nga seancat paraprake, pasi anëtarët e Këshillit të Sigurimit mund të kërkojnë nga palët të organizojnë një dialog interaktiv joformal, të lehtësuar nga BE-ja, për të diskutuar kështu çështjen e mos-zbatimit të udhërrëfyesit për energjinë apo edhe mosgatishmërisë së Kosovës për themelimin e Asociacionit të Komunave me Shumicë Serbe.

“Prioriteti kryesor i Këshillit është ruajtja e stabilitetit në Kosovë. Një çështje kyçe për Këshillin në këtë drejtim është se si të parandalohet përshkallëzimi i tensioneve përgjatë kufirit Kosovë-Serbi që mund të rrjedh nga zbatimi i vendimit të Qeverisë së Kosovës për targat”, thuhet në këtë komunikatë për media.

Anëtarët e Këshillit, shkruan më tej në komunikatë gjatë seancës për Kosovën mund të kërkojnë nga të dyja palët “të riangazhohen në përpjekjet diplomatike për të çuar përpara dialogun dhe të heqin dorë nga kërcënimi ose përdorimi i forcës kundër njëra-tjetrës”.

Sipas komunikatës Anëtarët e Këshillit të OKB-së janë mbështetës të dialogut të lehtësuar nga BE-ja dhe punojnë për të krijuar kushte për normalizimin e marrëdhënieve ndërmjet Kosovës dhe Serbisë.

“Anëtarët presin nga të dyja palët angazhim pa parakushte dhe me mirëbesim duke zbatuar kështu marrëveshjet ekzistuese dhe duke i ikur veprimeve dhe retorikave që mund të rrisin tensionet”.

Sipas OKB-së dialogu është në një ngërç ndërsa marrëdhëniet ndërmjet dyja vendeve ka qenë përgjithësisht e qëndrueshme që nga seanca e fundit për Kosovën në kuadër të Këshillit të Sigurimit e mbajtur më 20 prill.

Nikola Selakoviç dhe Donika Gërvalla në OKB, më 20 prill

Ndryshe seanca paraprake u mbajte më 20 prill, ku Kosova u përfaqësua nga ana e ministres së Punëve të Jashtme të Kosovës, Donika Gërvalla.

Ajo përball saj pati, ministrin e Punëve të Jashtme të Serbisë, Nikola Selakoviç.

Përfaqësimi i Kosovës në OKB nga ana e Gërvallës gjashtë muaj më parë ishte dinjitoze.

Ajo kishte potencuar se Serbia është satelit i Rusisë dhe se zyrtarët shtetëror serb janë pasardhësit e Millosheviç’it.

Sipas saj Serbia në asnjë rast nuk ka kërkuar falje për krimet e luftës në Kosovë, përkundrazi Beogradi zyrtar gjithmonë ka glorfikuar kriminelët si hero.

“Supermacia serbe është e gjallë, Serbia vazhdon të destabilizojë jo vetëm Kosovën, por edhe rajonin”, pati deklaruar ajo.

“Është për keqardhje që Serbia nuk mund të distancohet nga krimet e Millosheviçi-it dhe jo vetëm në Kosovë, por në Slloveni, Kroaci, Bosnje e së fundi në Kosovë”.

Ajo më tej kishte theksuar se zyrtarët serb, jo vetëm që provojnë të falsifikojnë faktet, por veprojnë njëjtë sikur Millosheviç’i duke viktimizuar vetën se gjoja serbët në Kosovë po keqtrajtohen.

“Lufta në Ballkan nisi me krijimin e perceptimit se minoriteti serbë është në rrezik, dhe se duhet që Serbia të ndërhyjë, të bëjë propagandën dhe lajmet e rreme, siç është rasti Panda në Pejë, që e bënë sikur ushtarët e UÇK-së vranë serbët”.

/Albanianpost.com


Lajmet kryesore