Koreja e Veriut lëshon raketën e dytë në vetëm gjashtë ditë

Koreja e Veriut ka lëshuar një raketë që pretendojnë të jetë hipersonike, por, në fakt dyshohet se ishte balistike.

Lëshimin e kësaj rakete, Koreja e Jugut tha se e zbuloi në orën 07:27 me orën lokale të së martës (22:27 të hënën).

Edhe roja bregdetare e Japonisë gjithashtu raportoi lëshimin, duke thënë se Koreja e Veriut kishte gjuajtur një “objekt të ngjashëm me raketën balistike”.

Ai vjen menjëherë pasi gjashtë vende lëshuan një deklaratë duke i kërkuar veriut të pushojë “veprimet destabilizuese”.

“Ushtria jonë zbuloi një raketë balistike të dyshuar, të lëshuar nga Koreja e Veriut nga toka në drejtim të Detit Lindor”, tha shefi i përbashkët i shtabit të Koresë së Jugut (JCS), duke shtuar se autoritetet e inteligjencës nga Koreja e Jugut dhe Shtetet e Bashkuara ishin në proces të kryerjes së një analize të detajuar.

Lëshimi i fundit nënvizon zotimin e udhëheqësit të Koresë së Veriut Kim Jong-un për të forcuar mbrojtjen e vendit si pjesë e prioriteteve të politikës së tij për vitin 2022, të cilat u përshkruan gjatë një takimi kyç në dhjetor.

Të hënën, misioni i SHBA-së në Kombet e Bashkuara, së bashku me Francën, Republikën Irlandeze, Japoninë, Mbretërinë e Bashkuar dhe Shqipërinë, lëshuan një deklaratë të përbashkët duke dënuar testin e dukshëm të javës së kaluar.

“Këto veprime rrisin rrezikun e llogaritjes së gabuar dhe përshkallëzimit, gjithashtu përbëjnë një kërcënim të rëndësishëm për stabilitetin rajonal”, tha ambasadorja e SHBA-së në OKB, Linda Thomas-Greenfield.

Grupi i bëri thirrje Koresë së Veriut “të përmbahet nga veprimet e mëtejshme destabilizuese… dhe të angazhohet në dialog kuptimplotë drejt qëllimit tonë të përbashkët për denuklearizimin e plotë”.

Koreja e Veriut e ka mirëpritur vitin e ri me dy teste raketash radhazi.

Testi i sotëm mund të përkojë me një takim të Këshillit të Sigurimit të OKB-së në Nju Jork – ku SHBA-të dhe aleatët e saj dënuan nisjen e javës së kaluar.

Por mund të kryejë edhe disa funksione të tjera

Një mund të jetë largimi i vëmendjes së publikut nga një situatë gjithnjë e më e rëndë ekonomike në vend, e cila është përkeqësuar nga pandemia e koronavirusit.

Një tjetër mund të jetë tërheqja e vëmendjes së Uashingtonit, i cili ka treguar pak interes për rifillimin e negociatave me Phenianin pas samitit të dështuar midis ish-presidentit Donald Trump dhe Kim Jong-un në vitin 2019.

Ekziston një arsye e tretë, e cila raportohet më rrallë. Koreja e Veriut dhe ajo e Jugut janë të angazhuar në atë që vëzhguesit thonë se është një garë armësh gjithnjë e më intensive, me të dyja palët që punojnë për të përsosur sisteme raketore më të vogla, më të sakta dhe më vdekjeprurëse me të cilat mund të kërcënojnë lidershipin e njëra-tjetrës.

Testet e fundit vijnë ndërsa Pheniani po lufton me mungesat e ushqimit për shkak të një bllokade të koronavirusit që ka prekur rëndë ekonominë e tij.

Në takimin e fundvitit të partisë në pushtet, Kim tha se vendi po përballet me një “luftë të madhe për jetë a vdekje”, duke shtuar se rritja e zhvillimit dhe përmirësimi i standardeve të jetesës së njerëzve ishin ndër synimet e këtij viti.

Zyrtarët e OKB-së kishin paralajmëruar më herët se fëmijët dhe të moshuarit e cenueshëm në Korenë e Veriut ishin në rrezik nga uria.

SHBA-të i kanë bërë thirrje Koresë së Veriut të heqë dorë nga armët e saj bërthamore dhe marrëdhënia e Phenianit me administratën e Presidentit Joe Biden, e cila deri më tani ka qenë e mbushur me tensione.

Koreja e Veriut gjithashtu ka akuzuar vazhdimisht Korenë e Jugut për standarde të dyfishta lidhur me aktivitetet e saj ushtarake.

Koreja e Jugut testoi së fundmi raketën e saj të parë balistike të lëshuar nga nëndetëse, e cila tha se ishte e nevojshme si parandalim kundër “provokimeve” të Koresë së Veriut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.