Koreja e Veriut gati t’i japë Rusisë 100 mijë ushtarë për të luftuar në Ukrainë, sipas medias ruse

Koreja e Veriut i ka gati 100 mijë ushtarë për t’ja dhënë Rusisë, në luftën që Kremlini po zhvillon në Ukrainë.

Ose të paktën kështu pretendon televizioni shtetëror rus, ku një deklaratë e tillë u transmetua drejtpërdrejt për publikun.

Sa e vërtetë është? Kjo nuk dihet, pasi nuk ka asnjë të dhënë nga Koreja e Veriut momentalisht.

Mirëpo, deklaratën, e ka bërë një personazh i njohur publik, Igor Korotchenko, gazetar rus i cili merret me çështjet e mbrojtjes.

“Ka raportime se po përgatiten 100 mijë ushtarë nga Koreja e Veriut, vullnetarisht, për të marrë pjesë në konfliktin me Ukrainën”, tha ai gjatë një emisioni në Kanalin 1 të televizionit shtetëror rus.

Madje, ai ka shtuar se nuk ka asnjë të keqe që Rusia t’i lejojë ata të marrin pjesë në luftë, duke qenë se duan.

Pavarësisht kësaj, deklarata e Korotchenko duhet marrë me rezerva të mëdha, duke qenë se sensacionalizmi tek ai ka qenë i përhershëm mbi këto çështje.

Mirëpo dyshimet publike, nuk kanë si të hidhen poshtë në të tillë mënyrë dhe publiku kërkon shpjegime.

Do të përgjigjet vallë Kim Jong Un?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.