‘Kontroll në terren për të parë gjendjen faktike të depozitave të naftës’

Ministrja e Infrastrukturës dhe Energjisë, Belinda Balluku, ka bërë me dije se do të nisë kontrollin në terren për të parë nga afër gjendjen faktike të depozitave të naftës të kërkuar në bazë të Vendimit të Këshillit të Ministrave 808 të vitit 2004.

Gjatë takimit me furnizuesit e karburantit për shkak të rritjes së menjëhershme të çmimit të naftës gjatë këtyre ditëve, Balluku theksoi se duke u bazuar te kjo VKM shteti ka të drejtën të ndërhyjë për të parë rezervat e sigurisë që duhet të jenë gjatë periudhës së krizës.

“Kjo VKM shpjegon dhe momentin kur gjykohet që kemi një krizë, dhe sot ndodhemi para saj”, theksoi Balluku.

Kontrolli ka të bëjë me rafineritë, të cilat janë të detyruara që të mbajë rezerva sigurie për 90 ditë të barabarta shitje.

Sakaq ministrja iu kujtoi furnizuesve dhe gjobat, që sipas saj vlera e masës administrative do të jetë deri në 50% të vlerës së sasisë së produktit që mungon nga kuota.

“Duam që të përmbushen rezervat faktike, që dalin nga ministria e Infrastrukturës. Ministria i ka të gjitha të dhënat, që na dorëzon nga doganat dhe tatimet”, vijoi Balluku.

Nga ana tjetër Ministrja ju bëri me dije furnizuesve se rafineritë e naftës, rezervën e sigurisë mund ta mbajnë dhe në formën e naftës bruto. Këtu ajo cilësoi rezervat që duhen mbajtur brenda vendit.

“Kjo na tregon ne dhe verifikon që këto depozita janë nën administrimin tuaj. Sasia varet, jo më pak se 30% në depozitat e subjekteve”, vijoi ajo në fjalën e saj.

Më herët fjalën i pari e mori kreu i qeverisë Edi Rama, i cili njoftoi se brenda 24 orësh do të  miratohet akti normativ dhe do të ngihet bordi kombëtar i furnizimit me karburant.

Përveç Ramës dhe Ballukut e pranishme në takim ishte dhe ministrja e Financave dhe Ekonomisë, Delina Ibrahimaj.

Kujtojmë që çmimi i naftës arriti vlerë prej 260 lekë për litër. Kjo rritje e beftë solli reagimin e menjëhershëm të shoqërisë civile, që prej dy ditë ditësh kanë dalë në protestë përpara Kryeministrisë – shpesh duke bllokuar dhe kryqëzime kyçe në Tiranë – dhe jo vetëm por edhe në shumë qytete të tjera të Shqipërisë, të cilët kërkuan uljen e çmimit të naftës dhe heqjen e taksës së saj.

Protestuesit kanë paralajmëruar sërish protesta më të mëdha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.