Konjufca tha atë që s’e thotë dot Kurti vetë, “po e përgatisin terrenin për militantët”

“Për më shumë se një dekadë, eksponentët e Vetëvendosjes kanë hedhur baltë e vnerë kundër secilit që ka thënë ato fjalë që Kryeparlamentari [Glauk Konjufca] i tha të premten”, ka deklaruar në një prononcim për Albanian Post, nënkryetarja e partisë Demokratike të Kosovës, Vlora Çitaku.

Këto komente Çitaku i bëri pas deklaratës së Galuk Konjufcës, i cili tha në intervistë te gazetarja Jeta Xharra se me Marrëveshjen Bazë të arritur në Bruksel dhe aneksin në Ohër, Kosova ka pranuar ta themelojë Asociacionin e Komunave me Shumicë Serbe sipas Marrëveshjes së vitit 2013.

Kjo po bëhet, tha Konjufca, për ta marrë njohjen de facto.

Por, nënkryetarja e PDK-së, pohon për AP se këtë njohjen de facto, për të cilën foli Konjufca, Serbia e ka bërë “me secilën marrëveshje të nënshkruar nga pararendësit e Kurtit”.

Madje, ajo thekson se kreu i ekzekutivit kosovar ka pranuar në Ohër të Maqedonisë së Veriut “marrëveshjen për mosnjohje reciproke”.

“Ndërkohë që neni 7 është shumë më shumë se Asociacioni”, vlerëson ajo, derisa thotë se është “autonomi politike”.

Kurti, ndryshe nga Konjufca, në një nga seancat parlamentare të Kuvendit në shkurt të këtij viti, thoshte se Asociacioni “është Zajdenicë e Hashim Thaçit edhe e Isa Mustafës”, por duke iu “falënderuar qeverisë me mua kryeministër nuk po zbatohet, sa për juve [opozitën] moti ish kry ajo”.

Por, numri dy i LVV-së, në një paraqitje televizive të premten e pranoi se me Marrëveshjen Bazë të arritur në Bruksel dhe Aneksin në Ohër, Kosova jo vetëm që pranoi Asociacionin sipas vitit 2013, por tha edhe se po bëhet luftë që Kosova të mos jap diçka tjetër.

Këto ndryshime qëndrimesh në një periudhë kaq të shkurtër kohore nga partia në pushtet, për profesorin e Shkencave Politike, Dritëro Arifi, shpërfaqin një “moskonsistencë” të kësaj partie, për të cilën pohon se ka pasur që nga themelimi i saj në vitin 2005.

“Por, për fat të keq, tani moskonsistenca e tyre po tregon naivitet, mosnjohuri dhe joseriozitet edhe karshi partnerëve tanë ndërkombëtar”, tha Arifi në një bisedë për AP, teksa shtoi se qeveria aktuale i ka mohuar gjithnjë të arriturat e ekzekutiveve paraprake.

Përveç kësaj, për profesorin e Shkencave Politike, deklarimet e Konjufcës, janë ato të cilat “s’po mundet që t’i thotë vetë kryeministri Kurti”.

“Po e përgatisin terrenin para militantëve të vet që Asociacioni do të bëhet, sepse është nënshkruar më herët kinse për njohje de facto”, shtoi.

Por, edhe në këtë mes, pohon Arifi, ka një degradim, pasi që “nga ajo njohja në qendër erdhëm te Asociacioni me njohje de facto”.

Gjithë këtë situatë, ai e përshkruan si “joserioze”, madje edhe “degradim të qëndrimit të vetë shtetit të Kosovës”.

Pas disa muajsh mohime të ndryshme, më në fund, kryeparlamentari i Kosovës, Glauk Konjufca, në një paraqitje televizive e ka pranuar se me Marrëveshjen Bazë të arritur në Bruksel dhe Aneksin në Ohër, Kosova ka pranuar ta themelojë Asociacionin e Komunave me Shumicë Serbe sipas Marrëveshjes së vitit 2013 dhe ta marrë njohjen de facto nga Serbia.

“A e din çka është kjo Marrëveshja e Ohrit se po e di ku po don me dal”, i tha Konjufca gazetares Jeta Xharra, duke vazhduar më tej elaborimin.

“Neni 7 i Marrëveshjes së Ohrit është – se dy pjesë janë këtu njohja de facto edhe qyky Asociacioni – me mujtë Kosova, kurgjo pa e ngarku Kosovën më shumë se që ka pranu Qeveria Thaçi 2013, kurgjo ma shumë për mos me dhanë për me arritë t’i me fitu njohjen de facto. Qekjo na është dukë neve deal (marrëveshje) e mirë”.

• Për Asociacionin Lëvizja Vetëvendosje kishte organizuar protesta të mëdha, madje pakënaqësitë e tyre ndaj këtij mekanizmi i kishin shprehur edhe në seancat parlamentare, ku kishin hedhur gaz lotsjellës.

Konjufca e pranon/Neni 7 i Aneksit është: Kosova ta bëjë Asociacionin e vitit 2013 dhe ta fitojë njohjen de facto – kjo na është dukur marrëveshje e mirë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.