Konjufca mbyll seancën, Opozita: S’keni numër për të qeverisur dhe ne s’kemi numër për të ju rrëzuar
![](https://albanianpost.com/wp-content/uploads/2023/10/7A5B6614-8194-4496-B4BF-FAED7651FEED_w1080_h608.jpg)
Kryetari i Kuvendit të Kosovës, Glauk Konjufca e ka mbyllur seancën e së enjtes kjo pasi që opozita e ka lëshuar sallën e Kuvendit me arsyetimin e mosvotimit të tri pikave që i kanë quajtuar “jashtëzakonisht të rëndësishme” për Policinë e Kosovës.
Shefi i grupit parlamentar të Partisë Demokratike të Kosovës, Abelard Tahiri, ka thënë se në raste të tilla do të duhej që të ishim bashkë me Policinë e Kosovës.
Prandaj, bëri të ditur se s’do të jenë pjesëmarrës në këtë seancë.
“Në emër të grupit parlamentar të Partisë Demokratike të Kosovës, ku kërkohet mbështetje ndaj Policisë së Kosovës në tri pika jashtëzakonisht të rëndësishme. Ne refuzojmë që të marrim pjesë më tutje në këtë seancë. Konsiderojmë që s’ka gjë më të rëndësishme sesa të ishim bashkë në mbështetje të Policisë së Kosovës”, tha Tahiri.
Edhe shefi i grupit parlamentar të Lidhjes Demokratike të Kosovës, Arben Gashi ka thënë se s’do të marrin pjesë në këtë seancë.
“Ju nuk keni numër për të qeverisur dhe e vërteta është qe ne s’kemi numër për të ju rrëzuar. Pra, na duhet një kompromis politik për të dalur nga kjo situatë”.
“Zgjedhja e parë e mundshme është gjithmonë që të shkojmë në zgjedhje, e dyta zgjerimi i koalicionit dhe zgjedhja e tretë shpërndarja e vullnetshme e Kuvendit s’ka zgjedhje tjetër”.
Pas këtyre deklaratave, Konjufca ka kërkuar nga deputetët e pushtetit që të numërojnë vetën.
Ndërsa, më pas ka marrë vendim për t’i liruar nga Kuvendi.
“Mazhoranca nëse ka mundësi të e numëroj vetën do të ishte mirë. Jemi 53 deputetë kështu që ju liroj nga Kuvendi i Kosovës, kur të bëheni 61 më tregoni”.
Pushteti në seancën e së enjtes ka kërkuar që opozita t’i votojë marrëveshjet ndërkombëtare, ndërsa opozita ka kërkuar që të votohen tri pika për Policinë e Kosovës që përfshinin shtesën për rrezikshmëri, sigurimet shëndetësore dhe ligji për pensionim të parakohshëm.
Si përfundim e Kuvendit seanca mbaroi pa miratimin e asnjërës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com