Konjufca mbi thelbin e propozimit franko-gjerman: Serbia heq dorë nga pretendimi mbi Kosovën

Kryetari i Kuvendit të Kosovës, Glauk Konjufca, ka thënë se thelbi i propozimit franko-gjerman të cilin Albanian Post e ka publikuar me 18 shtator, është që Serbia njëherë e mirë të heq dorë nga pretendimet e saj mbi Kosovën.

“Kush e ka lexuar atë plan, esenca është kjo”, theksoi Konjufca gjatë një interviste në Klan Kosova.

“Është një plan, bërthama e të cilit është e shëndoshë”, pohoi ai duke krahasuar Planin e Ahtisarit (Pakoja e Ahtisarit) me propozimin e ardhur nga Franca dhe Gjermania.

“Plani i Ahtisarit ka qënë më shumë për Kosovën, ky tjetri është më shumë për Serbinë, në kuptimin që nëse pajtohet Serbia që Kosova është e pavarur, është shumë më i rëndësishëm se nota verbale e njohjes”.

Numri dy në hiearkinë shtetërore, vazhdoi duke treguar detaje nga teksti i “kornizës së re” të dialogut i përpiluar pas angazhimit të dy kolosëve të diplomacisë evropiane, Jens Plotner dhe Emanuel Bonne, dhe i cili është aktualisht mbi tavolinën e bisedimeve mes Prishtinës dhe Beogradit dhe siç vë në pah Konjufca, Kosova e ka problem që t’i thotë jo marrëveshjes.

“Ky plan ndërtohet mbi tri principe, është e drejta e barabartë mes shteteve, respektimi i sovranitetit reciprok dhe është e drejta e palëve për vetëvendosje”, është shprehur ai.

“Aty është edhe një princip tjetër problematik për ne, ku thuhet të respektohen të gjitha marrëveshjet e deri tanishme”.

Ndërkaq, Konjufca bëri të ditur se Qeveria e Kosovës i ka kthyer përgjigje pozitive propozuesve.

“Qeveria i ka dërguar mendimet e tij rreth këtij plani dhe të gjitha ato rezerva që i kemi e kanë fjalinë e parë, paraprihet prej fjalisë me të cilën fillon që është ky – në bazë është një plan i mirë për me i zgjidh deri në njohjen e plotë relacionet mes Kosovës dhe Serbisë”.

Krejt në fund, shefi i kuvendit potencoi se Kosova s’duhet të krijojë iluzione, edhe nëse Serbia hipotetikisht e pranon propozimin, sepse ajo në çdo moment mund ta thyejë këtë marrëveshje.

Ekskluzive, “korniza e re” në dialog: Marrëveshje përmbajtësore vitin e ardhshëm, finalja pas 10 vjetësh – Kosova fiton njohje nga 5-shja e BE’së, anëtarësim në organizata; Serbia përfiton ndihma masive

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.