![](https://albanianpost.com/wp-content/uploads/2024/06/fffffffffffffff.png)
Kryetari i Kuvendit të Kosovës, Glauk Konjufca, ka fajësuar Bashkimin Evropian lidhur me çështjen e Asociacionit të Komunave me Shumicë Serbe, duke thënë se s’do të marrë epilog pa ndryshimin e qëndrimeve të BE-së.
Sipas Konjufcës, drafti i BE-së përmban parregullsi dhe ndërhyn direkt në kompetencat e Kosovës.
“Sa i përket Asociacionit, ju e dini që është një temë shumë e përfolur në vendin tonë, por e cila s’mund të marrë epilog për shkak të mënyrës se si është shtruar nga Bashkësia Ndërkombëtare. Drafti që është dorëzuar nga Bashkimi Evropian ka një parregullsi sepse kjo nuk është kompetencë e Bashkimit Evropian”, ka deklaruar Konjufca pas mbledhjes së kryesisë.
Ai ka thënë se në rast se qëndrimi i BE-së s’ndryshohet kjo do të interpretohet si një përpjekje për të marrë me forcë kompetencat e shtetit të Kosovës.
“Nëse Bashkimi Evropian se modifikon këtë qëndrim atëherë i bie që dëshiron të ia marrë me zor një kompetencë të shtetit të Kosovës, kjo mendoj që është e pamundur në relacionet tona që i kemi me BE-në”.
Konjufca: Me Osmanin e Kurtin para Bashkësisë Ndërkombëtare jemi të një mendje dhe jemi të një goje
Kryetari i Kuvendit, Glauk Konjufca, ka deklaruar se raportet mes kryeministrit të Kosovës, Albin Kurti dhe presidentes Vjosa Osmani janë mjaftë të mira dhe sipas tij s’janë për t’u dramatizuar.
“Relacionet mes kryeministrit dhe presidentit duke më përfshirë edhe mua mendoj që relacionet janë të mirë, s’ka asgjë dramatike. Ndryshimet që mund t’i kemi në qëndrime politike nuk mund të dërgojnë në luftë politike, këtu s’ka asnjë luftë politike mes përfaqësuesve që përfaqësojnë institucionet qendrore”.
![](https://albanianpost.com/wp-content/uploads/2024/06/dddddddddddddddd.png)
Konjufca, ka thënë se ndryshimet e mendimeve të tyre për çështje të ndryshme janë normale, por që qëndrimet e tyre para Bashkësisë Ndërkombëtare janë të “një mendje” dhe “të një goje”.
“Mund të ketë qëndrime të ndryshme për çështje të ndryshme, por që janë të natyrshme dhe ndodhin në çdo shtetet të botë, por kur dalim para Bashkësisë Ndërkombëtare gjithmonë jemi të një mendje dhe jemi të një goje, kështu ka qenë deri tash në çdo prezantim të interesit të Kosovës, që kemi pasur”, deklaroi Konjufca para gazetarëve.
Më 5 qershor edhe presidentja e Kosovës, Vjosa Osmani, duke folur për marrëdhëniet me kryeministrin Albin Kurti, pas tensioneve të fundit, ka thënë se kur vendoset interesi nacional para se gjithash, dallimet janë të tejkalusheme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com