Konjufca: Afrim Bunjaku e Enver Zymberi ranë në krye të detyrës, po mbronin atdheun nga Serbia

Enver Zyberi dhe Afrim Bunjaku ranë në krye të detyrës për të mbrojtur atdheun nga Serbia.

Kështu ka thënë Kryetari i Kuvendit, Glauk Konjufca, pas vizitës që ka pasur në familjet e të dy heronjve, për nder të ditës së policëve të rënë në krye të detyrës.

“Jemi në përvjetorin, në ditën e cila, për shkak të rënies së Enver Zymberit, është caktuar edhe dita e policëve të rënë, për t’i përkujtuar ata. Ishim edhe në familjen e Afrimit e tash te familja e Enverit, të heronjve tanë”, tha fillimisht Konjufca.

“Takuam familjarët e tyre dhe shprehëm rëndësinë që e ka kjo datë e cila përkujton të gjithë policët e rënë në detyrë, por të gjithë atyre padyshim u prin Afrim Bunjaku e Enver Zymeri që janë heronjtë tanë, e të cilët ranë në krye të detyrës për ta mbrojtur atdheun tonë, për ta mbrojtur atë nga Serbia, për ta mbrojtur atë kur atdheu ynë u sulmua në të dy rastet”, shtoi.

Ky, sipas të parit të Kuvendit, është shembulli më i vlefshëm, e të cilin, pohon ai, “duhet ta kultivojmë si shoqëri, e të cilin duhet ta kujtojmë”.

“Sepse është shembulli që kur atdheu rrezikohet e sulmohet, nuk duhet të kursejmë asgjë nga vetvetja”, potencoi Konjufca dhe shtoi se “kështu bën Afrimi dhe Enveri sepse dhanë më të shtrenjtën e tyre”.

“Nuk u frikësuan që ta japin jetën”.

Kjo, në prizmin e tij, me siguri është e vlefshme edhe “për policët e tjerë, kolegët e tyre të gjallë, të cilët e vazhdojnë punën e tyre për me mbrojt Kosovën dhe për të siguruar rendin, sundimin e ligjit në vendin e tyre”.

Këtë të premte janë bërë 13 vjet që nga koha kur polici Enver Zymberi ishte vrarë në Veri të vendit, në një aksion që policia e kishte marrë në atë pjesë të vendit për të shtrirë sovranitetin.

Ndërsa, Afrim Bunjaku u vra më 24 shtator 2023, pasi që një grup terroristësh, të prirë nga kryekrimineli Milan Radojiçiç, sulmuan Policinë e Kosovës në Banjë të Zveçanit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.