Konflikti i Yemen-it/ Arabia Saudite, me plan paqeje

Arabia Saudite ka propozuar një plan të ri paqeje për t’i dhënë fund luftës gjashtëvjeçare në Yemen.

Ky pakt sugjeron një armëpushim midis qeverisë së Yemen-it, e cila mbështetet nga sauditët dhe rebelëve Houthi, të cilët përkrahen nga Irani.

Plani gjithashtu përfshin rihapjen e disa rrugëve ajrore dhe detare. Këto të fundit janë jetësore për tregtitë e këtyre vendeve. Rifillimi i negocimeve politike është gjithashtu thelbësor.

Nga ana tjetër, rebelët Houthi kanë thënë se kjo ofertë nuk është e mjaftueshme. Bllokada e rrugëve ajrore dhe detare duket se do të qëndrojë ende.

Propozimi u prezantua nga ministri i Jashtëm saudit, Princi Faisal bin Farhan, i cili ua drejtoi konkretisht rebelëve Houthi.

Sipas Farhan-it, “kjo marrëveshje mund të hyjë në fuqi menjëherë sapo të pranohet nga rebelët”.

Qeveria e Yemen-it, e njohur ndërkombëtarisht, është dakord me ofertën saudite. Por, Houthi-t, kanë dhënë sinjale se “nuk ka asgjë të re në këtë propozim”.

“Prisnim që Arabia Saudite të deklaronte fundin e bllokadës së porteve dhe aeroporteve. Gjithashtu një iniciativë për të lejuar kalimin e 14 anijeve që po mbahen peng nga koalicioni”.

Pavarësisht një qasjeje negative ndaj ofertës së çastit, shefi negociator i Houthi-ve, Mohammed Abdulsalam, tha për Reuters se “grupimi rebel do të vazhdojë bisedimet me sauditët, SHBA-në dhe ndërmjetësit e Oman-it për të arritur një marrëveshje paqeje”.

Sauditët ndërkohë kanë bërë me dije se kanë një koordinim me Kombet e Bashkuara për çështjen. Me SHBA-në gjithashtu.

Presidenti amerikan, Joe Biden, e përshkroi situatën në Yemen si “katastrofën humanitare më të madhe në botë”. Gjithashtu nga SHBA-ja është paralajmëruar një qasje e re në politikën e jashtme.

Vëmendja kryesore e tyre do të jetë zbatimi i të drejtave të njeriut dhe lirive themelore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.