Komuniteti shqiptaro-amerikan letër Biden-it, shprehin shqetësimin për rrezikun nga Serbia

Organizata shqiptaro-amerikane nga pjesë të ndryshme të Shteteve të Bashkuara të Amerikës i kanë dërguar të martën një letër Presidentit të ShBA-së, Joe Biden, në të cilën kanë shprehur shqetësimin për veprimet e Serbisë ndaj Kosovës, duke iu referuar sulmit terrorist në Banjskë të Zveçanit.

Ata kanë kërkuar që ShBA dhe Bashkimi Evropian të marrë masa kundër presidentit serb Aleksandër Vuçiç.

“Ne jemi thellësisht të shqetësuar nga kërcënimi i vazhdueshëm që paraqet Serbia dhe presidenti i saj Aleksandër Vuçiç ndaj Kosovës dhe popullit të saj”, thuhet në letrën e nënshkruar nga rreth 90 shoqata dhe grupe shqiptaro-amerikane.

Shqiptaro-amerikanët, në letrën e tyre i kanë kërkuar presidentit Biden një takim për të diskutuar për gjendjen e krijuar në Kosovë.

Kjo letër drejtuar kreut të Shtëpisë së Bardhë është për shkak të sulmit të 24 shtatorit në Banjskë të Zveçanit, ku mbeti i vrarë polici Afrim Bunjaku, dhe po ashtu dislokimi i trupave ushtarake serbe në kufirin me Kosovën – që u kundërshtua menjëherë nga vendet perëndimore.

“ShBA dhe BE duhet të marrin masa ndaj presidentit Vuçiç dhe të mos ta lejojnë atë të nxisë dhunën, të armatosë terroristët dhe të kërcënojë fqinjët e tij. Serbia nuk mund të mbetet anëtare e komunitetit perëndimor duke mbajtur njëkohësisht lidhje të ngushta me Rusinë”, vazhdon letra.

Në këtë letër përmendet edhe fakti që ish-nënkryetari i Listës Serbe – i dorëhequr së voni – terroristi Milan Radojiçiç, e mori përgjegjësinë për sulmin terrorist të 24 shtatorit ndaj Policisë së Kosovës, “së bashku me Bojan Mijailovic, një truprojë e ministrit të Brendshëm Aleksandër Vulin”, i cili është i sanksionuar nga Departamenti Amerikan i Shtetit për krim të organizuar, operacione të paligjshme lidhur me narkotikë dhe lehtësimin e aktiviteteve keqdashëse të Rusisë në Ballkanin Perëndimor.

Përveç këtyre, aty përmendet edhe deklarata e ambasadorit amerikan në Prishtinë, Jeff Hovenier, se sulmi “ishte i koordinuar dhe i sofistikuar” se personat e armatosur duket të kanë pasur stërvitje ushtarake dhe se sasia e armëve lë të kuptohet se kishte një plan “për të destabilizuar sigurinë në rajon”.

“Sulmi terrorist është pjesë e një sërë përpjekjesh për të destabilizuar Kosovën dhe rajonin. Serbia ka treguar herë pas here se përbën rrezik për Kosovën, fqinjët e saj dhe komunitetit ndërkombëtar më gjerë”.

“Shtetet e Bashkuara dhe Bashkimi Evropian nuk mund ta trajtojnë më Serbinë si një partner i besueshëm ndërkohë që ajo furnizon dhe tani strehon terroristë të armatosur rëndë”.

Aktivistët shqiptaro-amerikanë, përveç këtyre, kanë nënvizuar lidhjen e veçantë mes Kosovës dhe Shteteve të Bashkuara të Amerikës.

“Si shqiptaro-amerikanë krenarë, ne vlerësojnë thellësisht mbështetjen e palëkundur të Shteteve të Bashkuara për pavarësinë, sovranitetin dhe integritetin territorial të Republikës së Kosovës”, thuhet në letër, duke shtuar se ky komunitet është i shqetësuar për rolin e Serbisë duke i quajtur veprimet e saj si “një rrezik të qartë dhe të pranishëm ndaj popullit, sigurisë, sovranitetit dhe integritetit territorial të Kosovës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.