Lipjani, Drenasi, Ferizaji dhe Prizreni, të enjten, janë shpallur si komunat më transparente për vitin 2023.
Komunat e udhëhequra nga Partia Demokratike e Kosovës dhe Lidhja Demokratike e Kosovës – dy partitë opozitare në parlament – janë vlerësuar nga Instituti Demokratik i Kosovë (KDI) me 97 pikë në kuadër të programit për qeverisje lokale dhe pjesëmarrje qytetare.
Drejtori ekzekutiv i KDI-së, Ismet Kryeziu, ka thënë se sipas gjetjeve transparenca komunale në nivel komunash përgjithësisht ka shënuar rënie të lehtë krahasuar me raportin e vitit 2022.
“Është e nevojshme të vazhdohet puna për rritjen e nivelit të transparencës dhe llogaridhënies, për të ruajtur dhe përmirësuar qëndrueshmërinë e nivelit të transparencës, sidomos në ato komuna që kanë pasur performancë më të dobët sa i përket përmbushjes së standardeve”.
Komunat në Veri të Kosovës, sipas Kryeziut për shkak se janë përballur me kontekste specifike politike kanë treguar rezultat të dobët në transparencën dhe llogaridhënien politike.
Për këtë sukses të komunave të udhëhequra nga PDK-ja, ka reaguar edhe kryetari i kësaj partie, Memli Krasniqi.
“Këto suksese të komunave tona nuk janë më një risi – por rezultate të një pune profesionale, efikase dhe në shërbim të qytetarëve.”
“Me mbi 90 % të pikëve të grumbulluara kanë dalë edhe katër komuna të tjera që udhëhiqen nga PDK-ja, Skenderaj, Kaçaniku, Mitrovica e Jugut dhe Vushtrria, ndërsa edhe Hani i Elezit është pozicionuar afër tyre. I përgëzoj kryetarët e komunave tona për përkushtimin e tyre në shërbimin publik”.
Modeli i qeverisjes që e vendos interesin qytetar në qendër, sipas Krasniqit, po rikonfirmohet vit pas viti si modeli më i suksesshëm në vend.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
