“Komunat e përfshira kthehen në agjenci të Serbisë në Kosovë”, Hasani për draftin e FES-it që Qeveria do frymëzohet
Qeveria e Kosovës i dërgoi të enjten Presidentit të Asamblesë Parlamentare të Këshillit të Evropës një letër ku zotohen se do ta përgatisin një draft për Asociacionin e Komunave me Shumicë Serbe, të frymëzuar nga ai i Fondacionit Friedrich Ebert (FES).
Mirëpo, eksperti më i mirë i çështjeve kushtetuese në Kosovës, ish-kryetar i Gjykatës Kushtetuese, Enver Hasani, duke folur për draftin e FES-it, kishte thënë se komunat e përfshira në këtë draft kthehen në agjenci të Serbisë në Kosovë.
Hasani kishte renditur disa prej pasojave që mund të shkaktonte ky draft i propozuar nga organizata gjermane në rast të implementimit, ndër të cilat kishte përmendur edhe kompetencat ekzekutive që përmbante drafti.
“Do të veçoja disa gjëra që janë mjaft problematike: e para, ajo që shihet qartë nga prezantimi dhe mbrojtja e djeshme e këtij drafti nga akterët e tij është se ata nuk e kanë të qartë se Asociacioni që propozojnë përfaqëson një entitet legal të së drejtës publike, me kompetencë ekzekutive autonome”, shpjegonte Hasani.
“E dyta, kjo shihet nga vetë fakti thjeshtë se vendimet e Asociacionit i nënshtrohen kontrollit të ligjshmërisë, gjë që nuk ndodh me entitete legale që janë nga e drejta private; e treta, përfaqësimi i komunave, jo i qytetarëve të saj, në Kuvendin e Asociacionit, bën që ai të jetë agjenci shtetërore që zëvendëson ushtrimin e juridiksionit në sferën e vetëqeverisjes lokale nga ana e komunave ekzistuese”.
Kjo nënkupton, siç tregonte Hasani, se Kuvendi, që definohet si një organ suprem i tij, “të jetë konjuktural dhe të dominohet nga vullneti grupeve të ngushta të interesit, jo nga vota e qytetarëve që jetojnë dhe veprojnë në komunat anëtare të Asociacionit”.
“Së fundi, roli dhe pozita e Serbisë ka kuptim në nivel të vetëqeverisjes lokale, por jo edhe në nivel të përfaqësimit të komunave anëtare, të cilat me Statut shndërrohen si një agjenci e Serbisë në territorin e Kosovës”, thoshte Hasani më 31 janar të vitit të kaluar, një ditë pasi që ishte publikuar.
Ndryshe, fondacioni “Friedrich-Ebert-Stiftung” dhe “Instituti Evropian për Paqe” kishin publikuar më 30 janar të vitit të kaluar një draft-statutin për Asociacionin e Komunave me Shumicë Serbe.
Çka ndodhi?
Pak ditë pasi Kryeministri i Kosovës, Albin Kurti e cilësoi si “absurde” kërkesën e Gjermanisë dhe Francës për dërgimin e draft-statutit të Asociacionit të Komunave me Shumicë Serbe në Gjykatë Kushtetuese për shqyrtim dhe kështu e la Kosovën jashtë agjendës së seancës së Komitetit të Ministrave, ku do të votohej pro apo kundër anëtarësimit të Kosovës në Këshillin e Evropës, Qeveria e Kosovës, të enjten, njoftoi se ka vendosur ta dërgojë një draft-statut për Asociacionin në Kushtetuese brenda majit.
Vetëm pak ditë pasi autoritetet kosovare argumentuan se Berlini e Parisi kanë ngatërruar dy procese të pavarura, pra procesin e dialogut dhe procesin e anëtarësimit në Këshillin e Evropës dhe se ky kusht i ri “nuk përkon aspak me vlerat dhe parimet e KiE-së”, Ministrja e Punëve të Jashtme të Kosovës, Donika Gërvalla, në letrën që e ka dërguar më 15 maj Këshillit të Evropës, ka potencuar se në Kushtetuese do ta dërgojnë një draft-statut të përgatitur nga vetë Qeveria dhe jo draft-statutin e Bashkimit Evropian, i cili iu prezantua palëve vitin e kaluar.
Sipas letrës së Gërvallës, Qeveria po punon në një draft-statut të frymëzuar nga ai i Fondacionit Friedrich Ebert (FES).
“Në përputhje me frymën e nenit 7 në lidhje me nenin 10 të Marrëveshjes Bazë, ne tashmë kemi filluar konsultimet me përfaqësuesit e pjesëtarëve të komunitetit serb për të marrë parasysh nevojat e tyre. Në këtë drejtim, Qeveria e Kosovës po përgatit një draftstatut për Asociacionin, të inspiruar nga FES-i që do të dërgohet në Kushtetuese deri në fund të majit 2024”, thuhet në letrën e ministres.
Marrë për bazë këtë hapë konkret, Gërvalla në letër ka potencuar se “presim që Komiteti i Ministrave të ketë arsye shtesë ta ftojë Kosovën të bëhet anëtarja e 47-të e Këshillit të Evropës”.
Pasi e humbi KiE-në, Kurti dërgon draft-statut për Asociacionin në Kushtetuese
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
