Komisioni i Rithemelimit dërgon në Gjykatë statutin e ri

Komisioni i Rithemelimit i Partisë Demokratike ka dërguar në Gjykatën e Tiranës, për regjistrim ndryshimet statutore të votuara në Kuvendin e 11 dhjetorit i thirrur nga ish-kryetari i PD-së, Sali Berisha.

Katër ditë me parë është miratuar në parim ky statut me propozim të një grupi anëtarësh dhe mbështetjen e të paktën 15% të delegatëve.

Këtë e konfirmoi drejtuesi i komisionit të Kuvendit të Kombëtar të Partisë Demokratike – thirrur nga lideri historik i saj Sali Berisha për të shkarkuar kreun aktual Lulzim Basha – Belind Këlliçi.

“Kuvendi vendosi ngritjen e Komisionit të rithemelimit të PD-së i përbërë nga Agron Shehaj, Albana Vokshi, Belind Këlliçi, Bujar Nishani, Edith Harxhi, Edi Paloka, Edmond Spaho. Ervin Minarolli, Flamur Noka, Genc Memaj, Genc Pollo. Gent Strazimiri, Keltis Kruja, Ledina Mandija, Mimoza Hajdarmataj, Oerd Bylykbashi dhe Sali Berisha”, vijoi Këlliçi në fjalën e tij.

Një ditë më parë, Partia Demokratike ka depozituar pranë Gjykatës së Tiranës kërkesën për ndryshimet e statutit të partisë dhe organeve të reja, të zgjedhura në Kuvendin Kombëtar të 17 korrikut.

Përkatësisht, Gjykata e Tiranës ka regjistruar çështjen. Shqyrtimi i saj do të bëhet nga gjyqtarja Blerina Muça.

Në kërkesën e PD-së janë pasqyruar ndryshimet në statut dhe organet e reja.

Kjo lëvizje erdhi disa ditë pasi ish-lideri i PD-së, Sali Berisha të shtunën e 11 dhjetorit mbajti Kuvendin Kombëtar me rreth 5 mijë delegatë dhe mijëra mbështetës për të shkarkuar kreun aktual, Lulzim Basha.

Nga “Komisioni i Përkohshëm i Rithemelimit të PD-së”, u miratuan disa ndryshime statutore dhe shkarkimi i Bashës.

Për këtë të fundit, fjalën e fundit e ka referendumi i 18 dhjetorit nga anëtarësia e PD-së.

Nga ana tjetër, Basha çdo vendim të dalë nga ky Kuvend e ka quajtur nul dhe 18 dhjetori do të jetë Kuvendi i vetëm Kombëtar i legjitimuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.