Komisioni i Ekonomisë në Shqipëri ka shtuar fondet për 19 institucione me vlerë mbi 1.3 miliardë lekë.
Kjo, me dakordësi të Ministrisë së Financave.
Institucionet e drejtësisë, burgjet dhe siguria kibernetike kanë marrë më shumë fonde shtesë, sesa ishte parashikuar fillimisht në projektbuxhet.
Në projektbuxhetin e vitit 2024 janë parashikuar rreth 1.2 miliardë euro investime publike, ku përfshihen edhe 70 milionë euro që do të përdoren për procesin e rindërtimit. Për pensionistët është parashikuar indeksimi i pensionit në muajin tetor si dhe bonusi i fundvitit, me vlerë totale 77 milionë euro.
Reforma e pagave në sektorin publik do të marrë 110 milionë euro në vitin që vjen, me qëllim që paga mesatare në sektorin publik të arrijë në 900 euro. Kurse borxhi publik përllogaritet në vlerën 14. 3 miliardë euro.
Sakaq, më datë 7 dhjetor, projektbuxheti i vitit 2024 i kalon Kuvendit për miratim.
Çfarë parashikon buxheti?
Kujtojmë se ministri i Financave dhe Ekonomisë, Ervin Mete ka bërë prezantimin e projektligjit “Për buxhetin e vitit 2024” .
Ai bëri me dije se “ne parashikojmë një rritje ekonomike prej 3.8% për vitin e ardhshëm”, duke e konsideruar si “një balancë primare pozitive, konsolidim të mëtejshëm fiskal, rritje të punësimit dhe ulje të inflacionit”.
“Duke mbështetur rritjen e pagave dhe duke bërë të mundur që brenda vitit 2024 të realizohet objektivi i vendosur nga qeveria për të arritur një nivel page mesatare prej 900 euro në muaj. Projektbuxheti parashikon një fond prej 11 miliardë lekësh për rritjen e mëtejshme të pagave të mjekëve të përgjithshëm, infermierëve dhe punonjësve të tjerë shëndetësorë, mësuesve në arsimin parauniversitar, forcave të rendit, të mbrojtjes dhe niveleve zbatuese të administratës qëndrore dhe vendore”.
Në total, theksoi Mete “efekti i përgjithshëm në buxhet për financimin e kësaj reforme madhore në sistemin e pagave kap vlerën 39 miliardë lekë”.
“Gjithashtu financohet indeksimi i pensioneve, i cili në dy vitet e fundit kap shifrën rreth 25 miliardë lekë. Vijon mbështetja për mbrojtjen sociale dhe shtresat në nevojë, duke alokuar rreth 33%, 1/3 e shpenzimeve të përgjithshme publike për skemën e pensioneve, ndihmën ekonomike, pagesën e paaftësisë, pagesën e papunësisë, asistencën sociale, ish-të përndjekurit, ish-pronarët, etj”.
Sipas ministrit, financimi i investimeve publike të programuara për vitin 2024 do të jetë mbi 5% të PBB-së, duke mbështetur në vazhdimësi rritjen ekonomike, për të zhvilluar më tej turizmin, bujqësinë dhe konektivitetin, si edhe duke nxitur punësimin.
“Paketa e investimeve mbështet infrastrukturën kombëtare dhe vendore, për t’iu përgjigjur sa më mirë kërkesës në rritje të turizmit. Projektbuxheti vijon të financojë procesin e rindërtimit, në vijim edhe të mbështetjes së dhënë përmes Aktit Normativ”.
Ndër të tjera ai tha se “respektohet niveli i kërkuar lidhur me angazhimet e anëtarësimit në NATO, me 2% të PBB-së në vitin 2024 dhe kjo arrihet për herë të parë”.
“Rritet ndjeshëm buxheti në dispozicion për njësitë e pushtetit vendor, ku për vitin 2024 shpenzimet parashikohen të jenë 71 miliardë lekë, ose 10.4% më shumë se buxheti i vitit 2023. Pjesë e rëndësishme e buxhetit të pushtetit vendor është granti i qeverisjes qëndrore për njësitë vendore në masën 36.5 miliardë lekë”.
Në daljen e tij, ai theksoi se nuk do të ketë prekje të TVSH-së në sektorin e arsimit dhe në shërbimet financiare.
Sa i takon akcizës, Mete tha se nisur edhe nga niveli i inflacionit në këto dy vite, është vendosur një tavan prej 1.5% indeksim çdo dy vite.
Me kalimin në parim, buxheti u “përball” me tymueset dhe zhurmat e opozitës…Po tani?
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
