Nënkryetarja e Partisë Demokratike dhe kryetarja e Komisionit Hetimor për Inceratorët, Jorida Tabaku, në një dalje për mediat, të mërkurën e 22 dhjetorit, ka deklaruar se mazhoranca nuk do që t’i shkojë deri në fund hetimeve për këtë aferë korruptive.

Anëtarët e komisionit nga radhët e Partisë Socialiste refuzuan mbledhjen e komisionit gjatë kësaj dite, me arsyen se ka përfunduar sesioni parlamentar për këtë vit.

“Është për të ardhur keq që PS-ja bojkotoi sot mbledhjen. Ajo premtoi se nuk do të kishte mbrojtje politike për këtë çështje. Ky komision dhe Prokuroria e Posaçme (SPAK) po i afrohen të vërtetës”, tha Tabaku në fjalën e saj.

Tabaku theksoi se kjo ishte e pajustifikueshme dhe e papranueshme, ku paralajmëroi se nëse përsëritet kjo situatë, ajo do ta ndjekë në rrugë penale.

“PS-ja është vënë në mbrojtje të interesit korruptiv të Kokës – i arrestuar nga SPAK. Po përpiqet që të mbrojë edhe persona të tjerë politik të përfshirë në këtë aferë”, shtoi më tej Tabaku duke iu referuar emrave si kryeministri Edi Rama, zëvendëskryeministri Arben Ahmetaj, kryetari i Bashkisë Tiranë, Erion Veliaj dhe sekretari i përgjithshëm i PS-së Damian Gjiknuri.

Sipas Tabakut pa u vënë drejtësia të këta të fundit, “SPAK dhe Komisoni Hetimor s’kanë për të kryer punën e tyre. Shqiptarët duhet të dinë se ku ka shkuar 430 milionë euro të aferës së inceneratorëve”.

“Avokatët mediatikë nuk mund të ndalojnë punën e PD-së që ka nisur të denoncojë këtë aferë që në 2016-ën. E kuptoj se pse koncensionari nuk jep të dhëna”, vijoi Tabaku.

Në përfundim ajo i bëri thirrje SPAK-ut që të shtrihet te personat me pushtet.

“Sot Lefter Koka është pa mandat dhe mbrojtje. Ata që janë me mandat deputeti dhe pushtet e mbrojtje të hetohen. Askush nuk është mbi ligjin”, e përmbylli fjalën e saj Tabaku.