Komisioni hetimor për 25 prillin/ PS dorëzon relacionin: PD refuzon të japë informacion për mbrojtjen e votës

Partia Socialiste të mërkurën e 17 nëntorit ka dorëzuar në Komisionin Hetimor – të ngritur për zgjedhjet e 25 prillit – një relacion, ku thotë se Partia Demokratike ka refuzuar që të japë informacion për Strukturën e Mbrojtjes së Votës.

Në relacionin e PS-së thuhej se PD-së i është kërkuar informacion mbi këto Struktura – e njohur nga kryetari dhe deputetët e saj – por, përgjigja ka qenë e prerë se, “dispozita ligjore në fjalë disiplinon marrjen e vendimeve nga Komisioni dhe parashikon pranimin e kërkesave për hetime dhe prova pa votim”.

Në vijim të relacionit theksohej se PD-ja ka refuzuar të japë informacion sipas kërkesës së Komisionit Hetimor pasi ajo vetë ka vlerësuar se kërkesa del jashtë objektit të punës së Komisionit.

Ky i fundit, në arsyetimin e PD-së cilësohej në relacion se, “është ngritur që të hetojë veprimtarinë e organeve të administratës publike dhe të pushteti vendor”.

Nga ana tjetër theksohej se fakti se PD-ja me refuzimin për të dhënë informacion, sipas relacionit të PS-së është në kundërshtim me ligjin Nr.8891/2002 dhe ka detyrimin ligjor për të dhënë informacion sipas kërkesës së PS-së.

Në përfundim duke renditur arsye –PS-ja kërkon nga Komisioni që t’i drejtohet PD-së duke e paralajmëruar për detyrimin e saj ligjor të dhënies së informacionit.

Komisioni Hetimor për zgjedhjet e 25 prillit ka nisur punën të premten e 22 tetorit mes debateve të PD-së dhe PS-së për miratimin e rendit të ditës. Kreu i Komisionit Hetimor për ‘25 prillin’, vjen nga radhët e demokratëve dhe është Enkelejd Alibeaj.

Ngritja e komisionit

Nga radhët e PS-së e patën bërë të qartë që më 11 tetor, se për ngritjen e komisionit hetimor për pretendimin e “masakrës zgjedhore” nga ana e demokratëve, do ta kalonte në Kuvend.

Ishte kreu i Grupit Parlamentar të të majtëve, Taulant Balla, i cili qartësoi qëndrimin e socialistëve mbi çështjen.

Më 1 tetor, nënkryetarja e Partisë Demokratike, Grida Duma, pat njoftuar se demokratët do të kërkonin ngritjen e tre komisioneve hetimore.

Ai i zgjedhjeve, ishte i pari që u pranua. Pritet që, në seancën e ardhshme, të votohet pro edhe për komisionin hetimor mbi “Inceneratorët”.

Ndërsa ngritja e një komisioni për shqyrtimin e çështjes “Becchetti” nuk u pranua nga mazhoranca.

Komisioni i parë që do të nisë zyrtarisht punën është ai i “masakrës zgjedhore”, me një periudhë të caktuar prej tre muajsh.

Nëse demokratët nuk arrijnë të verifikojnë shkelje në proces, atëherë një ndër kauzat e tyre më të mëdha në opozitë do të bjerë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.