Komisioni Hetimor, ish-ministri Cani: Kam refuzuar miratimin e Inceneratorit të Elbasanit

Ish-ministri i Financave, Shkëlqim Cani, në Komisionin Hetimor për Inceneratorët, i thirrur si dëshmitar, deklaroi se ka refuzuar të miratojë projektin e Inceneratorit të Elbasanit pasi nuk ishin respektuar procedurat në përputhje me ligjin.

“Ndërkohë ka ardhur dhe një projektvendim ku kërkohej të zbatohej një procedurë e veçantë për inceneratorin. Edhe kjo procedurë ka marrë përgjigje nga ne që nuk përputhet me ligjin”, tha Cani në fjalën e tij duke iu referuar kërkesave të Ministrisë së Mjedisit për ndërtimin e këtij Inceneratori.

Sipas tij çështja e mbeturinave ishte emergjencë dhe për të miratuar duhej ndërhyrja e qeverisë, e cila ndërmori një vendim të tillë me anë të një VKM-je.

“Po te kalohej buxheti dhe nuk do kishte reagim, do hynte ne fuqi pas buxhetit dhe rutina merrte kohen e vet. Që të përfshihej ose jo, duhej që qeveria të angazhohej sepse buxheti është një akt madhor sepse aty vendoset politika ekonomike për vitin e ardhshëm dhe afatmesëm. Në dijeninë time, besoj se jam i sigurt që nuk ka VKM që të miratojë këtë procedurë jashtë ligjit”, tha ndër të tjera Cani.

Ky i fundit theksoi se asokohe gjatë detyrës që ushtronte si ministër kishte kërkuar që si fillim kompanitë të fillonin punën, më pas të kryheshin pagesat nga buxheti i shtetit.

Gjatë kësaj dite ka pasur debate të shumta në punimet e këtij Komisioni mes anëtarëve të opozitës dhe mazhorancës.

Në orën 13:00 pas rifillimit të seancës, radhën për të dëshmuar e kishte kryetarja e Bashkisë së Durrësit, Emiriano Sako, e cila pas 45 minutash pyetje e përgjigje braktisi seancën e Komisionit.

Kryetarja e këtij komisioni, Jorida Tabaku, i adresoi dhjetë pyetje Sakos.

Kjo e fundit iu përgjigj pyetjeve të Tabakut, por pas pyetjeve të deputetes demokrate, Ina Zhupa, ajo braktisi seancën duke mos iu përgjigjur kështu asaj.

Fill pas këtij veprimi, Tabaku kërkoi nga anëtarët që të kallëzohet penalisht Sako për mos dëshminë e saj.

Ndërprerja

Më herët, seanca u ndërpre për shkak të debateve të forta mes palëve.

Shkak kryesor u bë një takim i Tabakut, me kreun e Prokurorisë së Posaçme, Arben Kraja, mëngjesin e kësaj dite.

Në nisjen e procesit të kësaj dite, zëvendëskryetarja nga radhët e Partisë Socialiste, Ermonela Felaj, bëri me dije se Tabaku do të kallëzohet penalisht, pasi ajo nuk ishte mandatuar nga ky komision për të zhvilluar këtë takim me Krajën.

“Sipas deklarimeve që keni bërë gjatë ditës së sotme, ju qartësisht keni kërkuar që të nxisni SPAK-un për të vepruar konform interesave politikë të PD-së. I keni ofruar mbështetje politike SPAK-ut, keni ofruar dokumente në dispozicion ende pa marrë një vendim Kuvendi”, tha Felaj në fjalën e saj.

Sipas kësaj të fundit, Tabaku do të kallëzohet në SPAK për veprën penale “Të ushtrimit të ndikimit të funksioneve publike në mënyre të paligjshme” dhe “Shpërdorim detyre”.

“Tabaku është duke shkelur ligjin pikë për pikë”, tha ndër të tjera Felaj.

Pas akuzës së Felajt, nisi përplasja e Tabakut, duke i bërë me dije se ajo e kishte njoftuar javën e kaluar Komisionin për takimin që do të zhvillonte me Krajën.

Tabaku iu drejtua Felajt që të qetësohej ose do të merrte masa ndëshkimore kundër saj, pasi ajo nuk po e linte të fliste.

Ndër të tjera, Tabaku vijoi duke thënë se Felaj dhe disa anëtarë të komisionit nga radhët e PS-së janë në konflikt interesi me ecurinë e hetimit.

Madje Luçiano Boçi, nga radhët e PD-së, theksoi se Felaj duhej të ishte dëshmitare e këtij komisioni dhe jo anëtare.

Pas qetësimit të debateve mes anëtarëve duke akuzuar njëri-tjetrin, u paraqit për të dëshmuar Valbona Ballgjini – ish-anëtare e Komisionit të Prokurimit të Inceneratorit të Tiranës.

Kjo e fundit nuk pranoi të dëshmonte me arsyetimin se e kishte dhënë një të tillë dhe mund të cenonte sekretin hetimor të SPAK-ut, pavarësisht se Tabaku i bëri me dije se po kryente vepër penale.

“Në momentin që jemi thërritur në SPAK na është lënë detyrë që asgjë të mos dalë nga ajo që është diskutuar atje. Kam ardhur në respekt të atij komisioni, por nuk do të jap asnjë përgjigje për asgjë, sepse më kanë thënë nga SPAK që çdo deklaratë cenon sekretin hetimor“, tha Ballgjini në fjalën e saj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.