Shqipëria

Komisioni Hetimor, Balluku dëshmon për Inceneratorët


Ministrja e Infrastrukturës dhe Energjisë, Belinda Balluku, pasditen e 21 shkurtit kishte radhën për të dëshmuar në Komisionin Hetimor për Inceneratorët.

Ajo bëri me dije se MIE-ja është autoriteti kontraktual dhe inceneratorët e Elbasanit dhe Fierit janë Partneritet Publik Privat, ndërsa ai i Tiranës është koncension.

Sipas saj MIE-ja e ka marrë detyrën të ndjekë kontratën që prej vitit 2018.

Anëtari i Partisë Demokratike, Helidion Bushati, iu drejtua Ballukut në lidhje me auditimet e Kontrollit të Lartë të Shtetit dhe çfarë masash janë marrë lidhur me rekomandimet e saj. Konkretisht në lidhje me përzgjedhjen e supervizorit.

Balluku u përgjigj e prerë se, “supervizori është zgjedhur me propozim të koncensioniarit duke sjellë tre kompani të ndryshme. I janë dorëzuar autoritetit kontraktor, për të bërë përzgjedhjen e tre kompanive. Kështu është bërë përzgjedhja”.

Nga ana tjetër Bushati vijoi duke pyetur Ministren se,“kemi tre inceneratorë ku pronari është i njëjti, mos është krijuar një familjaritet i sëmurë mes investitorit koncensionarëve apo supervizorit”, iu drejtua Bushati Ballukut.

Kjo e fundit iu përgjigj duke deklaruar se, “nuk më rezulton se të tre koncesionet janë me të njëjtin pronar juridik. Kam vënë re që në disa raste i referoheni kontratës dhe në disa raste e godisni këtë kontratë. Është momenti për tu unifikuar sa i përket vendimit për kontratën është për tu marrë për bazë apo  e merrni vetëm kur ju kemi një interes politik për ta përdorur”.

Më tej ajo u pyet se pse impianti i Elbasanit nuk ka nisur punën për prodhimin e energjisë  dhe dalja e saj në treg.

Ajo u shpreh se ky impiant është vendosur nën sekuestro dhe sa i përket vendosjes së çmimit nuk është në kompetencë të Ministrisë por të Entit Rregullator të Energjisë.

Përpara Ballukut kanë dëshmuar ish-ministri i Financave, Shkëlqim Cani, kryetarja e Bashkisë Durrës, Emiriana Sako dhe ish-anëtarja e Komisionit të Prokurimit të Inceneratorit të Tiranës, Valbona Ballgjini.

Ndërsa nga nga kryetarja e Komisionit, deputetaj demokrate Jorida Tabaku, është thirrur për të tretën herë radhazi administratorja e “Integrated Energy BV SPV” për Tiranës, Arjola Kodra. Kjo e fundit nuk i është përgjigjur thirrjes së Tabakut.

Ndërkaq priten për të dëshmuar Kryetatr i Bashkisë Fier, Armando Subashi dhe zëvëndëskryeministri dhe ministri i Shtetit për Rindërtimin dhe Programin e Reformave, Arben Ahmetaj.

Seanca e kësaj dite në këtë komision është shoqëruar me debate të shumta mes anëtarëve të opozitës dhe mazhorancës.

Shkak kryesor u bë një takim i Tabakut, me kreun e Prokurorisë së Posaçme, Arben Kraja, mëngjesin e kësaj dite.

Në nisjen e procesit të kësaj dite, zëvendëskryetarja nga radhët e Partisë Socialiste, Ermonela Felaj, bëri me dije se Tabaku do të kallëzohet penalisht, pasi ajo nuk ishte mandatuar nga ky komision për të zhvilluar këtë takim me Krajën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore