KOMF letër Kurtit, Muratit dhe Haxhiut: Shërbimet sociale rrezikojnë të mbyllen në 2024

Koalicioni i OJQ-ve për mbrojtjen e fëmijëve KOMF, përmes një letre të hapur drejtuar kryeministrit të Kosovës, Albin Kurti, ministrit të Financave, Punës dhe Transfereve Hekuran Murati dhe ministres së Drejtësisë, Albulena Haxhiu kanë kërkuar që të ndërmerren masa urgjente për parandalimin e mbylljes së shërbimeve sociale për fëmijët e cenueshëm.

Kjo kërkesë është bërë pasi sipas KOMF-it shërbimet sociale rrezikojnë të mbyllen në janar të 2024.

“Koalicioni i Organizatave për Mbrojtjen e Fëmijëve në Kosovë – KOMF, i cili përfaqëson 35 organizata jo qeveritare, ka adresuar sot një letër të hapur tek Kryeministri i Republikës së Kosovës, Ministri i Financave, Punës dhe Transfereve dhe Ministrja e Drejtësisë, duke kërkuar ndërmarrjen e masave të menjëhershme për parandalimin e mbylljes së shërbimeve sociale për fëmijët e cenueshëm”.

Nga KOMF, është kërkuar që të ketë sigurim të financimit për ofrimin e shërbimeve sociale.

“Konkretisht, KOMF ka kërkuar sigurim të financimit për ofrimin e shërbimeve sociale, të cilat janë jetike për fëmijët e cenueshëm, shërbime të cilat si pasojë e mos mbështetjes financiare nga Qeveria rrezikojnë të mbyllen nga 1 Janar 2024”.

“Shërbimet rezidenciale dhe shërbimet ditore për fëmijët pa përkujdesje prindërore, fëmijët viktima të abuzimit dhe keqtrajtimit, fëmijët viktima të dhunës në familje dhe viktimat e trafikimit (niveli i ulët dhe i mesëm i rrezikut), fëmijët me aftësi të kufizuara, etj., financohen pjesërisht nga Ministria Drejtësisë përmes thirrjeve publike çdo vit”.

Tutje është thënë se kjo organizatë e fëmijëve po vazhdon të lihet anash në mungesë të përkrahjes financiare.

“Nga viti 2016, ka zbrazëtira kohore mes thirrjeve/kontratave për mbështetje të këtyre shërbimeve duke lënë pa përkrahje financiare këto shërbime çdo fillim vit. Institucionet jo-publike të licencuar për ofrimin e shërbimeve sociale janë mbështetur financiarisht nga Ministria e Drejtësisë për ofrimin e shërbimeve”.

Ndërsa, është sqaruar se mbështetja financiare nga ministria e Drejtësisë kanë qenë vetëm në janar të 2024-ës.

“Mbështetja financiare nga Ministria e Drejtësisë ka qenë për periudhën Prill 2023 – Janar 2024 dhe si rrjedhojë shërbimet posedojnë financimin vetëm deri në Janar 2024. Në mungesë të fondeve për mbështetje të mëtutjeshme shërbimet rrezikojnë të mbyllen”.

“Ndërprerja e ofrimit të këtyre shërbimeve, qoftë edhe përkohësisht do të lërë pa strehë fëmijët viktima të akomoduar aktualisht në strehimore dhe po ashtu do të mbyllë derën për rastet e reja që mund të jenë në nevojë për shërbime rezidenciale, duke shkelur kështu të drejtën themelore të fëmijëve për mbrojtje”.

Po ashtu, janë theksuar edhe pasojat që mund të vijnë për shkak të mungesës së shërbimeve sociale.

“Në mungesë të shërbimeve sociale, fëmijët e cenueshëm, e sidomos fëmijët më aftësi të kufizuara do të mbesin të mbyllur në shtëpi dhe do të pësojnë regres në zhvillimin e tyre fizik, psikologjik dhe emocional”.

“Kjo situatë, do të rëndojë edhe gjendjen ekonomike dhe emocionale të familjeve të fëmijëve të cenueshëm, të cilët do të detyrohen që të marrin shërbime me pagesë, në bazë të mundësive të tyre financiare”.

Krahas mbylljes së shërbimeve, është thënë se do të pasojë edhe mbyllja e qendrave të specializuara për shërbime ditore, të cilat janë të pajisura me mjete pune, infrastrukturë, staf profesional dhe të licencuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.