Lajme

Kim Jong Un kritikon “papjekurinë” e zyrtarëve ndaj shpërthimit të COVID-19


Udhëheqësi i Koresë së Veriut, Kim Jong Un, e ka cilësuar reagimin e vendit të tij ndaj shpërthimit të parë të konfirmuar të COVID-19 si të papjekur.

Ai ka akuzuar zyrtarët e qeverisë për pamjaftueshmëri dhe inerci, pasi rastet e etheve përfshinë vendin, raportoi media shtetërore të mërkurën.

Koreja e Veriut raportoi 232 mijë e 880 më shumë njerëz me simptoma të etheve dhe gjashtë vdekje të tjera, pasi vendi zbuloi shpërthimin e COVID-19 javën e kaluar. Nuk tha se sa njerëz kishin rezultuar pozitivë me COVID-19.

Duke kryesuar një takim të Byrosë Politike të Partisë së Punëtorëve në pushtet të martën, Kim tha se “papjekuria në kapacitetin shtetëror për përballimin e krizës” rriti “kompleksitetin dhe vështirësitë” në luftimin e pandemisë, sipas KCNA-së.

Që nga njohja e parë e shpërthimit të COVID-19, janë raportuar 1.72 milionë pacientë me simptoma të etheve, përfshirë 62 vdekje që nga mbrëmja e së martës.

Megjithatë, Veriu gjithashtu tha se situata e virusit të vendit po merrte një “kthesë të favorshme”, duke shtuar se në takimin e partisë u diskutua “ruajtja e shansit të mirë në frontin e përgjithshëm të parandalimit të epidemisë”.

Raporti nuk elaboroi se për çfarë arsye Veriu erdhi në një vlerësim kaq pozitiv.

Vendi nuk ka filluar vaksinimet masive dhe ka aftësi të kufizuara testimi, duke lënë shumë ekspertë të shqetësuar se mund të jetë e vështirë të vlerësohet se sa gjerësisht dhe me shpejtësi po përhapet sëmundja.

Sipas KCNA-së, Koreja e Veriut ka bërë presion për të trajtuar më mirë “mbledhjen, transportin dhe testimin e ekzemplarëve nga ata persona me ethe, duke instaluar objekte shtesë karantine”.

KCNA gjithashtu tha se zyrtarët shëndetësorë kanë zhvilluar një udhëzues për trajtimin e COVID-19 që synon parandalimin e mbidozave të drogës dhe problemeve të tjera.

Zyrtarët dhe studiuesit kanë shtuar përpjekjet për të “zhvilluar dhe prodhuar masivisht ilaçe efektive në trajtimin e infeksionit të virusit malinj dhe për të vendosur metoda më racionale të diagnostikimit dhe trajtimit”, por KCNA nuk dha detaje se cilat ilaçe ishin të përfshira.

Përballë një shpërthimi të COVID-19, Koreja e Veriut ka mobilizuar forcat e saj të armatosura, duke përfshirë 3 mijë persona staf mjekësor ushtarak, për një sistem 24-orësh të shpërndarjes së ilaçeve, me 500 grupe reagimi për të konfirmuar dhe trajtuar pacientët e infektuar, tha media shtetërore.

Televizioni shtetëror tregoi një numër të madh trupash të mbledhur në një shesh për të mbështetur punën antivirus.

Një zëdhënës i zyrës së OKB-së për të drejtat e njeriut të martën deklaroi se masat e marra nga Pheniani për të luftuar COVID-19 mund të kenë pasoja “shkatërruese” për të drejtat e njeriut në vend, pasi kufizimet për të frenuar virusin mund t’i kufizojnë njerëzit të marrin ushqim të mjaftueshëm dhe të takohen me të tjerë.

Koreja e Jugut është ofruar të dërgojë furnizime mjekësore, duke përfshirë vaksina, maska ​​dhe komplete testimi, si dhe bashkëpunim teknik, në Veri, por Pheniani ende nuk është përgjigjur.

Marrë nga Reuters, përshtatur për Albanian Post

/Albanianpost.com


Lajmet kryesore