KFOR-i stërvitet për kontrollimin e trazirave dhe heqjen e pengesave

Misioni i NATO-s në Kosovë, KFOR, ka njoftuar se ka zhvilluar një stërvitje për kontrollimin e trazirave dhe heqjen e pengesave.

Sipas një komunikate për media, ushtarët grekë nga batalioni i dytë shumëkombësh i Forcës Rezervë Operacionale e realizuan këtë trajnim.

“Ushtarët grekë nga batalioni i 2-të shumëkombësh i Forcës Rezervë Operacionale zhvilluan një stërvitje trajnimi për kontrollin e trazirave dhe heqjen e pengesave në kampin Novo Selo”, kanë njoftuar nga KFOR-i.

Përpos ushtarëve grekë edhe ushtarët hungarezë të KFOR-it ofruan teknika të ndryshme për këtë lloj të trajnimit.

“Stërvitja u mbështet nga ushtarët nga Batalioni Rezervë Taktike Hungareze i KFOR-it, të cilët i ndihmuan ata të familjarizohen me teknikat, taktikat dhe procedurat specifike për këto lloj ushtrimesh”, thuhet në njoftim.

Tutje potencohet se KFOR-i “vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të ofruar një mjedis të sigurt dhe të sigurt për të gjithë”.

Ndryshe, më 12 korrik, Komandanti i KFOR-it, Ozkan Ulutas, ka zhvilluar një takim me komandantin e Forcës së Sigurisë së Kosovës, Bashkim Jashari, drejtorin e Policisë, Gazmend Hoxha dhe drejtorin e Agjencisë Kosovare të Inteligjencës (AKI), Petrit Ajeti me të cilët ka diskutuar për situatën e sigurisë.

Takimi i tyre është zhvilluar në shtabin e KFOR-it në “Camp Film City”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.