KFOR-i: Nuk ishim prezent në zonën ku ndodhi rrëmbimi i policëve të Kosovës

Misioni paqeruajtës i NATO-s në Kosovë (KFOR), nëpërmjet një komunikate për media, ka mohuar pretendimet se ishin prezent në zonën ku të mërkurën tre pjesëtarë të Policisë së Kosovës u rrëmbyen brenda territorit të vet nga strukturat e sigurisë së Serbisë.

Në komunikatë thuhet se KFOR-i ka dërguar një ekip në zonën ku ndodhi rrëmbimi dhe ka vendosur kontakte me përfaqësuesit e institucioneve në Kosovë dhe të autoriteteve serbe, por edhe me Misionin e Bashkimit Evropian për Sundimin e Ligjit në Kosovë (EULEX).

“KFOR-i gjithashtu është në kontakt të rregullt me misionin e udhëhequr nga BE-ja për sundimin e ligjit, EULEX-in. Ne u bëjmë thirrje palëve që t’i ulin menjëherë tensionet dhe të përmbahen nga veprimet e njëanshme, që mund të çojnë në përshkallëzim të mëtejshëm”, thuhet në komunikatë.

Nga misioni paqeruajtës thuhet se poe  monitoron situatën dhe vazhdon të zbatojë plotësisht mandatin e tij të Organizatës së Kombeve të Bashkuara – bazuar në Rezolutën 1244 të Këshillit të Sigurimit të OKB-së të vitit 1999 – për të siguruar një mjedis të sigurt dhe lirinë e lëvizjes për të gjitha komunitetet në Kosovë.

“Ai gjithashtu vazhdon të ofrojë kornizën e nevojshme të sigurisë për të çuar përpara dialogun e udhëhequr nga BE-ja për normalizimin e marrëdhënieve midis Beogradit dhe Prishtinës”, thuhet ndër të tjera në komunikatën e KFOR-it.

Tre zyrtarë kufitarë janë kidnapuar nga forcat serbe të mërkurën gjatë një patrullimi në vendin e quajtur Tresave/Bare, në vijën kufitare në veri të Kosovës. Megjithatë, autoritetet serbe pretendojnë se ata janë “arrestuar” nga njësitet anti-terror të strukturave serbe të sigurisë brenda territorit të Serbisë.

Autoritetet e Kosovës kanë kërkuar lirimin e menjëhershëm të tre zyrtarëve policorë të rrëmbyer nga xhandarmërisë serbe të mërkurën, reagimin e bashkësisë së organizuar ndërkombëtare lidhur me këtë rast dhe dënimin e Serbisë për agresionin e shfaqur ndaj sovranitetit dhe integritetit territorial.

Arrestimi i tre policëve kosovarë nga njësitet elitare të Policisë së Serbisë në vijën kufitare me Kosovën, ndodhi pikërisht në një periudhë tensionesh të larta ndërmjet Kosovës dhe Serbisë, veçanërisht në pjesën veriore të Kosovës të banuar serbë etnikë.

Kurti: Serbia shkeli Marrëveshjen e Kumanovës, presim që KFOR-i të marrë përgjegjësi ndërkombëtare

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.