Ylli i NBA-së, Kevin Durant, është bërë aksionar i pakicës te Paris Saint-Germain. Sipas raportimeve në “New York Times”, kompania e investimeve e Durant, “Boardroom”, bleu një pjesë prej disa milionë eurosh përmes një mjeti financiar të veçantë të krijuar nga “Arctos Sports Partners”, i cili tashmë ka investuar në klubin francez.

“Arctos”, një firmë private investimesh me bazë në SHBA, bleu 12.5% ​​të aksioneve në klubin e Ligue 1 vitin e kaluar, në një marrëveshje që burime pranë saj thanë në atë kohë do t’i kishte caktuar PSG-së një vlerësim prej rreth 4.25 miliardë euro.

Javën e kaluar, Durant mori kohë nga programi i tij Olimpik për të vizituar qendrën e re stërvitore të PSG-së në Poissy, në perëndim të Parisit dhe u takua me Presidentin Nasser Al-Khelaifi.

Burime të njohura me vizitën e tij thonë se ai shoqërohej nga menaxheri i tij dhe bashkëthemeluesi i “Boardroom”, Rich Kleiman. Të dyja palët ia “paraqitën” marrëveshjen njëra-tjetrës.

Durant, 35 vjeç, konsiderohet si një prej basketbollistëve më të mëdhenj të të gjitha kohërave. Të shtunën, gjatë Lojërave Olimpike të Parisit, ai shtoi një medalje të katërt të artë olimpike në koleksionin e tij, një rekord për basketbollin e meshkujve.

Ai është gjithashtu pikëshënuesi kryesor i SHBA-ve në garat olimpike si për meshkuj ashtu edhe për femra.

PSG ka shumë skuadra sportive përtej futbollit të meshkujve dhe femrave, duke përfshirë hendbollin, xhudon dhe sportet elektronike, megjithëse nuk kanë ende një ekip basketbolli.

Klubi është i njohur për eksplorimin e një sërë bashkëpunimesh nëpër arena të ndryshme sportive, duke synuar të forcojë statusin e tij ndërsa futbolli rritet në Shtetet e Bashkuara, midis Kupës së Botës për Klube 2025 dhe Kupës së Botës 2026.